BQO-nyń Aqjaıyq aýdanynda da jeńimpazdar forýmy bolyp, onda jastar bas qosty

Ásem bezendirilgen «Mereı» mádenı-demalys ortalyǵy halyqqa lyq toldy. Sahna tórine «Nur Otan» HDP aýdandyq fılıaly tóraǵasynyń birinshi orynbasary, aýdandyq qoǵamdyq shtab tóraǵasy Salaýat Aımuqashev, ardagerler uıymynyń tóraǵasy, aýdandyq shtab múshesi Ǵılaj Luqpanov, №1 orta mekteptiń muǵalimi Irına Kalenteva, aýdandyq aýrýhana dárigeri Ǵabıt Orazov, balalar shyǵarmashylyǵy ortalyǵynyń psıhology, «Jas óren» jastar qoǵamdyq birlestiginiń jetekshisi Botagóz Muhanbetova, aýdandyq kitaphana ádiskeri Saǵyntaı Bısenǵalıevtar shyǵyp, el qalaýynyń álem tanyǵan Elbasy ekendigin súısine áńgimeledi.

Táýelsizdik alǵannan bergi jıyrma jyl ishinde elimizdiń tarıhynda oryn alǵan oń ózgeristerge kýámiz, dedi olar. Densaýlyq, bilim berý salasy, jastarǵa qamqorlyq syndy áleýmettik máseleler jyl saıyn halyq tilegine saı sheshilýde. Dúnıejúzilik sharalar men halyqaralyq sport básekesiniń otanyna aınalyp otyrǵan da - Qazaqstan. Astana Sammıtiniń de tarıhı tańbasy talaı jyldarǵa jeter. Arý Astana álemdi tandandyrǵan alyp qalaǵa aınalýda. Bastysy, el tynyshtyǵy ekeni anyq. Barlyq el halqynyń jartysyna jýyǵy ózge ult ókilderi bolsa da, bizde bir atanyń balasyndaı tatýlyq qalyptasqan. Sóıtip, qazaq eli el Prezıdentin tańdaýda jańsaqtyq tanytqan joq. Halyq qalaýy N.Á.Nazarbaev boldy.

Forýmnan keıin aýdan ónerpazdary kontsert qoıdy.