BQO-nyń 55 aýylyna aýyz sý jetkiziledi

ORAL. QazAqparat - Tuńǵysh Prezıdent kúni qarsańynda Batys Qazaqstan oblysynyń Syrym aýdany Josaly aýyldyq okrýgindegi Qońyr jáne Tamdy eldi mekenderi ortalyqtandyrylǵan sý kózine qosyldy, dep habarlaıdy «QazAqparat» tilshisi.

Aýdan ákimi Tólegen Tóreǵalıevtiń aıtýynsha, 185 mln teńgeni quraıtyn bul joba «Nurly jol» baǵdarlamasy aıasynda júzege asyryldy. Oblys basshysy Altaı Kólginovtiń tapsyrmasyna sáıkes barlyq jumys ýaqytyly aıaqtalyp, 18 shaqyrym sý qubyry tartyldy. Joba barysynda (merdiger - «JaıyqGazSýQurylys» JShS) jergilikti jerden 25 adam jumyspen qamtyldy. Qos aýyldaǵy 240 úıdiń aýlasyna taza aýyz sý jetkizildi.

 

Bıyl Syrymda 1 mlrd astam teńgege aýdan ortalyǵy Jympıtyda turǵyn úıler men jol salynyp, Qońyr men Tamdyǵa qosa Araltóbe aýylyna sý qubyry júrgizildi, basqa da jumystar atqaryldy.

 

Aıta keteıik, oblysta barlyǵy 55 eldi mekendi (65 myń adam) ortalyqtandyrylǵan sý kózine qosý jumystary júrgizilýde. Sonyń nátıjesinde 186 aýyl taza aýyz sýǵa qol jetkizetin bolady.