BQO-nyń 2 aımaǵyna «Áskerı dańq aýdany» mártebesi berile me
NUR-SULTAN. QazAqparat - QR Premer-Mınıstriniń orynbasary Eraly Toǵjanov Batys Qazaqstan oblysynyń 2 aýdanyna «Áskerı dańq aýdany» mártebesin berý týraly Májilis depýtattarynyń usynysyna jaýap berdi, dep habarlaıdy QazAqparat tilshisi.
Aıta ketsek, 7 qazanda ótken Májilistiń jalpy otyrysynda Shavhat Ótemisov Úkimet basshysynyń orynbasary Eraly Toǵjanovqa joldaǵan depýtattyq saýalynda Batys Qazaqstan oblysyndaǵy Jánibek jáne Bókeı ordasy aýdandarynyń Stalıngrad shaıqasyndaǵy jeńiske qosqan úlesi zor ekenin atap ótip, atalǵan aımaqtarǵa «Áskerı dańq aýdany» mártebesin berýdi usynǵan edi.
«Qazirgi ýaqytta Batys Qazaqstannyń eki aýdanyna erekshe mártebe berý máselesi Qazaqstan Respýblıkasynyń zańnamalyq aktilerimen reglamenttelmegen. Osyǵan oraı ony qosymsha pysyqtaý jáne sheshim shyǵarý úshin quqyqtyq negiz ázirleý qajet. Sol sebepti jaýapty memlekettik organdarǵa Batys Qazaqstan oblysy Jánibek jáne Bókeı ordasy aýdandarynyń Stalıngrad shaıqasyndaǵy jeńiske qosqan úlesin zerdeleý jónindegi arnaýly komıssııany qurý boıynsha birlesken jumysty uıymdastyrý, BQO-nyń joǵaryda atalǵan aýdandaryna «Áskerı dańq aýdany« mártebesin berý protsesin zańnamalyq tártippen retteý máselesin pysyqtaý tapsyrmasyn berdim. Ortalyq memlekettik organdar júrgizgen jumystyń qorytyndysy sizge qosymsha habarlanady», - dedi Eraly Toǵjanov.
