BQO-ny Reseıdiń Saratov qalasymen baılanystyratyn jol jóndelýde
ORAL. QazAqparat - Batys Qazaqstan oblysynda «Nurly jol» baǵdarlamasyna sáıkes jalpy quny 23,1 mlrd teńge turatyn «Oral - Tasqala - RF shekarasy» jolyn (4-104 km) kúrdeli jóndeý jalǵasýda, dep habarlaıdy «QazAqparat» tilshisi.
BQO jolaýshylar kóligi jáne avtomobıl joldary basqarmasynan túsken málimetke qaraǵanda, Indýstrııalandyrý aıasyndaǵy jalpyulttyq telekópir barysynda Elbasymyz tusaýyn kesken atalmysh joba bastamashysy «QazAvtoJol» UK» AQ bolsa, merdigeri - «ıÝnıserv» JShS. Bul joldyń qurylysy 2015 jyly bastalyp, bastapqyda Ulttyq qordan 3 mlrd teńge bólinip, 11 shaqyrym jol qaıta salynǵan bolatyn. Soǵan oraı 101 jańa jumys orny ashylǵan edi. Ótken jyly 5,5 mlrd teńgege 17,1 shaqyrym jol jabyny qaıta tóseldi (93 jumys orny).
Bıyl 9,6 mlrd teńgeniń jumystary atqarylmaqshy. Kúni búgin josparlanǵan 53,9 km joldyń 2,8 shaqyrymy jóndeldi (62 jumys orny). 2018 jyly qalǵan 18 shaqyrymdy jóndeýdi bitirip, paıdalanýǵa tapsyrý kózdelýde.
Atalmysh joldyń halyqaralyq mańyzy da erekshe. Bul joba oblystaǵy, sonymen qatar Reseıdiń Saratov syndy qalalarymen jol qatynasyn jaqsartyp qana qoımaı, kórshi eldiń naryǵyna otandyq taýarlardy eksporttaý múmkindigin arttyrady.
