BQO-nyń taǵy bir aýdanynda úıler sý astynda qaldy
ORAL. KAZINFORM — Batys Qazaqstan oblysynda Syrym aýdanynda úıler sý astynda qaldy.
BQO ákimdiginiń baspasóz qyzmetinen málim etkenindeı, oblys ákimi Narıman Tóreǵalıev keshe keshkisin sý tasqyny bolǵan Syrym aýdanyna jol tartty.
Saǵat 22.30-da óńir basshysy aýdan ortalyǵy Jympıty aýylynda bolyp, úıleri sý astynda qalǵan turǵyndardy qaýipsiz oryndarǵa evakýatsııalaý jumystaryna jetekshilik etti.
Saǵat 22.30 ben 02.00 aralyǵynda Syrym aýdanyna qarasty 3 aýyldyń halqy túgeldeı jaqyn mańdaǵy qaýipsiz eldi mekenderge, týǵan-týystarynyń úılerine kóshirildi. Qutqarýshylar kúni-túni jumys istedi.
Saǵat túngi 00.00-de oblys ákimi arnaıy jyljymaly mobıldi kólikte jedel shtabtyń otyrysyn ótkizip, tótenshe jaǵdaılar departamentiniń basshysynan oblys boıynsha jaǵdaıdy surastyrdy.
Óńir basshysy túni boıy Tótenshe jaǵdaılar mınıstrimen baılanysta bolyp, basqa oblystardan qosymsha tehnıkalar men kúshterdiń Batys Qazaqstandaǵy sý tasqynynyń aldyn alýǵa baǵyttalýyn qamtamasyz etti.
Jergilikti saǵat tańǵy 05.00-ge deıin barlyq jumystyń júrgizilýin tolyqtaı qadaǵalady.
«Apat aıtyp kelmeıdi. Tasqyn sý turǵyndardyń úıin túgelimen jaılaǵan. Apattyń saldarynan elektr jelileri, uıaly baılanys, ınternet múldem jumys istemeı qalǵan. Osynaý qıyn kezde turǵyndardyń bir-birine degen qamqorlyǵy qýantty. Kórshi aýyldardaǵy Syrym aýdany turǵyndary qutqarýshylarmen qatar azamattardy kóshirýge qolushyn sozyp jatty. Bul birligimizdiń bekem ekenin kórsetedi. Narıman Tóreǵalıev aýdan ortalyǵyndaǵy sý deńgeıiniń túskenine kóz jetkizgen soń, Qaratóbe aýdanyndaǵy apattyq jaǵdaıdy baqylaýǵa jol tartty», - dep habarlady ákimdiktiń baspasóz qyzmeti.
Eske sala keteıik, budan buryn Oral qalasynda tótenshe jaǵdaı jarııalanǵanyn jazǵan bolatynbyz. Sondaı-aq Batys Qazaqstan oblysynda 350-ge jýyq adam evakýatsııalandy.
BQO-nyń Qaratóbe, Terekti aýdandarynda tótenshe jaǵdaı jarııalandy. Sonymen birge Batys Qazaqstan oblysyna Mańǵystaý men Almatydan qutqarýshylar kómekke jiberildi.