BQO-nyń shekaralas aýdandarynda ornalasqan 13 mektep taratylýy múmkin
ASTANA. KAZINFORM — Batys Qazaqstan oblysynyń shekaralas aýdandarynda ornalasqan 13 mektep taratylýy múmkin. Bul jaıynda Májilis depýtattarynyń saýalyna Premer-mınıstrdiń orynbasary Ermek Kósherbaevtyń jaýabynda aıtylǵan.
— Batys Qazaqstan oblysynyń shekaralas aýdandarynda ornalasqan 13 mektepke qatysty depýtattyq saýaldaryńyzdy qarap, kelesini habarlaımyz. Búgingi kúnde osy mektepter shtattyq negizde jumys istep jatyr. Bilim berý uıymdary jelisiniń kepildik berilgen memlekettik normatıvine sáıkes bilim alýshylar men tárbıelenýshilerdiń jalpy sany árbir aýyldyq eldi mekende saqtalsa bilim berý uıymdarynyń (kishi mektep jasyndaǵy adamdardyń sany 5 jáne odan kóp bolǵanda memlekettik bastaýysh, kishi jáne orta mektep jasyndaǵy adamdardyń sany 41 jáne odan kóp bolǵanda memlekettik negizgi orta, kishi, orta jáne joǵary mektep jasyndaǵy adamdardyń sany 81 jáne odan kóp bolǵanda memlekettik jalpy orta bilim beretin uıymnyń) jumys isteýine kepildik beriledi, — dedi vıtse-premer.
Onyń atap ótýinshe, «Bilim týraly» zańnyń 6-baby 2-tarmaǵy 6-tarmaqshasynyń negizinde balaǵa sapaly bilim berýge qatysty erejege sáıkes bolǵan jaǵdaıda jergilikti atqarýshy organnyń mektepterdi saqtap qalýǵa zańnamalyq barlyq múmkindigi bar.
— Degenmen, atalǵan mektepterde oqýshylar sanynyń belgilengen júktemeden edáýir az bolýyna baılanysty 2025-2026 oqý jylynda jalpy orta bilim beretin mektepti negizgige, negizgi orta mektepti bastaýyshqa aýystyrýǵa nemese taratýǵa táýekelder bar. Bul rette Oqý-aǵartý mınıstrligimen Batys Qazaqstan oblysynyń ákimdigine shekaralas aýdandardaǵy aýyl mektepterin saqtap qalý jáne ony damytý boıynsha hat joldandy. Qazirgi kezde Oqý-aǵartý mınıstrligi Bilim berý uıymdary jelisiniń kepildik berilgen memlekettik normatıvinen shekara aımaǵynda ornalasqan mektepterdi alyp tastaý máselesin pysyqtap jatyr. Jalpy atalǵan máseleler Úkimettiń baqylaýynda jáne olardy sheshý boıynsha jumystar odan ári jalǵasatyn bolady, — dedi Ermek Kósherbaev.
Buǵan deıin elimizdegi mektepterdiń 70 paıyzǵa jýyǵy aýyldyq jerlerde ornalasqan jáne kópshiligi shaǵyn jınaqty mektepter ekenin jazǵan edik.