BQO-nyń kreatorlary Creative Aimaq jobasy aıasynda 5 mln teńgeniń ónimin satty
ASTANA. KAZINFORM — 26-27 qyrkúıekte Astanadaǵy Qazaq Creative Hub alańynda Qazaqstan Respýblıkasy Mádenıet jáne aqparat mınıstrliginiń qoldaýymen Creative Aimaq respýblıkalyq jobasy aıasynda Batys Qazaqstan oblysynyń «Jaıyq tolqyny» kreatıvti kórmesi ótti.
Óńir kreatorlary kórmede Batys Qazaqstannyń shyǵarmashylyq áleýetin tanytyp, jergilikti brendter men avtorlyq týyndylaryn usyndy.
Jármeńkege qolóner sheberleri, sýretshiler, zergerler, dızaınerler, aǵash jáne teri óńdeý isiniń 40-tan astam mamany qatysty.
Kópshilikke mýzykalyq aspap jasaý, aǵash óńdeý jáne sándik-qoldanbaly óner buıymdaryn ázirleý boıynsha sheberlik sabaqtary ótkizildi.
Baǵdarlamada jergilikti dızaınerlerdiń toptamalary da usynyldy. «Marııa hanym» sán úıi, AS_brands.kz jáne «DarıLılı» sán ortalyqtary óz toptamalaryn tanystyrdy.
Kórmede Batys Qazaqstannyń tarıhı-mádenı murasy da jan-jaqty tanystyryldy. «Balbaltas baıany» jáne «Mýzeı murasy» jobalary arqyly oblystyń tarıhy men qundy muralary kópshilikke keńinen nasıhattaldy. Sondaı-aq «Dolana» mýltfılmi kórsetildi.
Eki kún ishinde kórmege 3 myńǵa jýyq adam bardy. Óńir kreatorlary 5 mln teńgeniń ónimin satty.
Creative Aimaq jobasy óńir kreatorlaryn qoldaýǵa, otandyq brendterdi keńinen tanytýǵa, kreatorlardyń óz ónimin naryqqa shyǵarýyna jaǵdaı jasaýǵa, ulttyq murany dáripteýge jáne kreatıvti kásipkerlikti damytýǵa baǵyttalǵan.
