BQO-nyń keıbir aýdandarynda órt sóndirýge beıimdelgen tehnıkalar joq
ORAL. KAZINFORM – Batys Qazaqstan oblysynda jyl basynan beri jalpy aýdany 7,7 gektar 1 orman órti, sondaı-aq dalada 78,5 ga 10 janý oqıǵasy tirkeldi.
BQO TJ departamentiniń bastyǵy Rýslan Qasybaevtyń málim etkenindeı, ótken jyly osy merzimde 3 orman órti (221,1 ga), 423 ga 37 tabıǵı janý, 112 ga aýmaqta 1 dala órti bolyp, materıaldyq shyǵyn 2,5 mln teńgeden asqan edi. Onyń sózine qaraǵanda, qazirgi tańda departamenttiń aýmaqtyq bólimshelerinde 197 tehnıka (jaraqtandyrý – 70,8 paıyz) bar. Áli 81 tehnıka alý qajet. Sonymen qatar 80 tehnıka paıdalaný merzimine sáıkes esepten shyǵarylýǵa jatady.
«Bıyl departamenttiń materıaldyq-tehnıkalyq bazasyn nyǵaıtý maqsatynda oblystyq bıýdjetten 962 mln 656 myń teńge bólinip, ótimdiligi joǵary 1 apattyq-qutqarý kóligin, 7 tirkemeli motopompa jáne basqa tehnıkalar satyp alý josparlanyp otyr. Budan bólek 150 dana aspaly órt sóndirgish satyp alý úshin jergilikti qazynadan 8,6 mln teńge qarastyryldy. Bul baǵyttaǵy jumystar óziniń oń nátıjesin kórsetip keledi. Sońǵy bes jylda 1200-den astam aspaly órt sóndirgish alyndy», - deıdi R.Qasybaev.
Departament bastyǵynyń aıtýynsha, tabıǵı órtter men janýdyń aldyn alý jáne sóndirý úshin eldi mekenderde 152 erikti órtke qarsy quralym (2 247 adam) qyzmet etedi. 13 erikti quralym qoǵamdyq birlestikke kiredi. Quralymdarda 248 sý tasyǵysh, 392 traktor, 37 beıimdelgen tehnıka, 1 218 aspaly órt sóndirgish, 199 motopompa, 2 053 basqa da bastapqy quraldar bar.
«Syrym, Tasqala, Shyńǵyrlaý aýdandarynda sý tasyǵysh tehnıkalardyń sany az. Al Aqjaıyq, Báıterek, Bókeı ordasy, Jańaqala, Qaratóbe, Terekti aýdandarynda beıimdelgen tehnıkalar joq nemese tómen deńgeıde», - deıdi R.Qasybaev.
Departament málimeti boıynsha, bıylǵy 7 maýsymda Bórli aýdany ákimdiginiń apparaty «Batys Qamqor» jastar qoǵamdyq birlestigimen erikti órt quramasyn qurý jóninde memlekettik áleýmettik tapsyrys qyzmetterin kórsetý boıynsha 3 jylǵa shart jasaldy. Birlestik quramyna 90 erikti órt sóndirýshi kiredi, qazirgi tańda jumysshylar qabyldanyp jatyr. Barlyq erikti órt sóndirýshi arnaıy oqý ortalyqtarynda bastapqy daıarlyq kýrstarynan ótetin bolady.
Ótken jyly oblys aýmaǵynda 34 órt sóndirý beketi (206 adam) 83 myńnan astam turǵyny bar 162 eldi mekenniń jáne olarǵa tıip turǵan dala alqaptarynyń órtten qorǵalýyn uıymdastyrdy. Kúni búgin sonyń ishinde úsh beket (Terekti aýdany – 2, Qaratóbe – 1) qyzmet etpeı otyr. Munyń sebebi – Terektide baıqaýǵa 3 merdiger uıym qatysyp, qujattaryn rásimdeý jumysy júrgizilip jatyr. Qaratóbede baıqaý ótkizilip jatyr. Bıyl aýdandarda qosymsha 5 órt sóndirý beketin qurý kózdelgen.
«Qoryta aıtqanda, erikti órtke qarsy quralymdardyń materıaldyq-tehnıkalyq jaraqtalýy tómen deńgeıde bolýy tabıǵı órtter men janýlardy tez sóndirýge múmkindik bermeıdi. Erikti quralymdardyń jaraqtalý deńgeıi normalanbaǵan. Sol sebepti erikti órt sóndirýshilerdi qajetti qural-jabdyqtarmen qamtýdy keminde 70 paıyzǵa jetkizý qajet. Sondaı-aq jergilikti atqarýshy organdar mıneraldyq jolaqtardy tıisti deńgeıde júrgizbeıdi. Sonyń saldarynan órttiń memlekettik orman qoryna jáne eldi mekender aýmaǵyna kirip ketý qaýpi artýda. Sońǵy jyldary ormanǵa órttiń kópshiligi dala aýmaǵynan kirgen. Taǵy bir másele – polıgondarda shyqqan órttiń tyıylmaýy. Oblysta qatty turmystyq qaldyqtardy jınaıtyn 152 oryn belgilense, bıyl solarda 11 janý oqıǵasy (2023 jyly osy merzimde – 12) tirkeldi. Sondyqtan polıgon oryndaryn órt qaýipsizdigi talaptaryna sáıkestendirý úshin de tıisti sharalar qabyldaý kerek», - dep túıindedi oıyn R.Qasybaev.
Eske sala keteıik, budan buryn Oralda qoqys polıgonynan taǵy da órt shyqqanyn jazǵan bolatynbyz. Qalaǵa qarasty Zachagan kentinen 15 shaqyrym qashyqtyqta ornalasqan turmystyq qatty qaldyqtar polıgonynda órt qaıta-qaıta tutanyp, tolyq sóndirilmeı keledi. Sonyń saldarynan kúlimsi ıis qalaǵa deıin jetip, turǵyndardyń renishin týǵyzǵan.
