BQO-nyń eki turǵyny jalǵan operatsııalar arqyly memleketke 250 mln-ǵa jýyq teńge zalal keltirgen
ORAL. KAZINFORM — Batys Qazaqstan oblysynda sot óńirdiń eki turǵynyna qatysty aıyptaý úkimin shyǵardy.
BQO boıynsha ekonomıkalyq tergep-tekserý departamentiniń baspasóz qyzmetinen málim etkenindeı, olar taýarlardy naqty jetkizbeı, jumystardy oryndamaı jáne qyzmetterdi kórsetpeı, jalǵan shot-faktýralardy júıeli túrde jazyp berý shemasyn uıymdastyryp, qatysqany úshin kináli dep tanyldy.
Sottalýshylardyń biri buǵan deıin osyǵan uqsas quqyq buzýshylyq úshin jaýapkershilikke tartylǵan. Soǵan qaramastan, birneshe jyl boıy óziniń tanystaryna tirkelgen eki kásiporyndy paıdalanyp, zańsyz qyzmetin jalǵastyrǵan. Áýeli ol tanystaryna tirkelgen kásiporyndardyń elektrondyq kiltteri men mórlerine qol jetkizip, jalǵan shot-faktýralardy rásimdeýdi uıymdastyrǵan. Bul rette kompanııalar is júzinde málimdelgen qyzmetpen aınalyspaǵan. Oǵan qosa qajetti aktıvteri, kóligi, qoıma úı-jaılary, qyzmetkerleri men naqty ónim berýshileri bolmaǵan.
Jalǵan operatsııalar boıynsha aınalym 964,3 mln teńgege jetken.
Óz qyzmeti úshin sottalýshy jazyp berilgen jalǵan shot-faktýralar somasynyń shamamen 5 paıyzy mólsherinde syıaqy alǵan. Keıin túsken qarajat qolma-qol aqshaǵa aınaldyrylyp, syıaqy somasy shegerilip, kontragentterge qaıtarylǵan.
Bir kásiporynnyń atynan shot-faktýralardy jazyp berý isin júzege asyrýǵa onyń tanysy kómektesken. JShS-nyń resmı basshysy bolǵan ol qajetti qujattarǵa qol qoıyp, túsken qarajatty qolma-qol aqshaǵa aınaldyrýǵa qatysqan. Shemaǵa qatysqany úshin ol da aqshalaı syıaqy alǵan.
— Quqyqqa qaıshy áreketterdiń nátıjesinde memleketke 249,8 mln teńge kóleminde zalal keltirilgen. Sot sottalýshylardy kináli dep tanyp, árqaısysyna 2 jyl 6 aı merzimge bas bostandyǵyn shekteý jazasyn taǵaıyndady, — dep habarlady vedomstvodan.
Eske sala keteıik, budan buryn Oralda quny 100 mln teńgege jýyq zańsyz temeki aınalymynyń joly kesilgenin jazǵan edik.
