BQO-nyń eki aýdanynda shóp shyǵymdylyǵy tómen bolyp otyr
ORAL. KAZINFORM — Batys Qazaqstan oblysynda mal azyǵyn daıyndaý naýqany bastalǵannan beri 4,2 mln gektar shabyndyq shabyldy.
BQO aýyl sharýashylyǵy basqarmasy basshysy Jasulan Halıýllınniń óńirlik kommýnıkatsııalar qyzmeti alańynda ótken brıfıngte málim etkenindeı, ortasha ónimdilik ár gektarǵa 3,5 tsentnerden kelip, 1 mln 452 myń tonna mal azyǵy ázirlendi.
Jasulan Joldybaıulynyń sózine qaraǵanda, bul jospardyń 62,7 paıyzy bolyp otyr. Ótken jylǵy qaldyq shópti eseptegende, 1 mln 874 myń tonna pishen (81 paıyz) bar.
— Oblysta jem-shóp daıyndaý qarqyny ár túrli, bul túrli klımattyq jáne uıymdastyrýshylyq faktorǵa baılanysty. Mysaly, Aqjaıyq, Báıterek, Qaratóbe, Syrym, Terekti, Shyńǵyrlaý aýdandary qajetti shóptiń 75 paıyzynan astamyn daıyndap úlgerdi. Al Jánibek, Kaztalov aýdandarynyń jekelegen aýyldyq okrýgterinde shóp shyǵymdylyǵy tómen (gektaryna 1,1-2,5 tsentnerden). Sonyń saldarynan osy eki aýdanda mal azyǵyn daıyndaý qarqyny oıdaǵydaı emes, — dedi J.Halıýllın.
Onyń aıtýynsha, shóp ónimdiligi tómen bolyp otyrǵan Jánibek (qajettiliktiń 46,2 paıyzy jınalǵan) jáne Kaztalov (62 paıyz) aýdany keıbir okrýgteriniń sharýalary oblystyń basqa aýmaqtarynan mal azyǵyn daıyndap jatyr.
— Jem-shóppen qamtamasyz etýde qıyndyqtar týyndaýy múmkin ońtústik aýdandardyń máselesin qaraý úshin oblysta qurylǵan arnaıy shtab jumys atqaryp keledi. Mundaı shtabtar ár aýdanda da bar. Ońtústik aýdandardyń shóp qajettiligin oblys ishindegi ishki tasymaldaý arqyly jabýdy qarastyrý maqsatynda oblystyq orman sharýashylyǵy mekemelerinen rýlon quny 5 myń teńgeden mal azyǵy daıyndalýda. Sondaı-aq soltústik aýdandardan shóp jáne jem azyǵyn satýshylar týraly aqparat apta saıyn jańartylyp, usynylyp otyr, — dedi basqarma basshysy.
BQO aýyl sharýashylyǵy basqarmasynyń derekterine sáıkes bıyl egis alqaptarynan jaqsy ónim alynyp jatyr. Kúni búginge deıin 190 myń gektar egistik alqaby nemese 66,3 paıyzy orylyp, odan 271 myń tonna astyq jınaldy. Bul ótken jylǵydan (254 myń tonna) artyq.
Eske sala keteıik, budan buryn Batys Qazaqstanda mal azyǵy aldaǵy qysqa jetkilikti me, sony jazǵan edik.