BQO-nyń birneshe aýdanynda aýyz sýdyń quramy talapqa saı bolmaı shyqty
ORAL. KAZINFORM — Batys Qazaqstan oblysynda bıylǵy birinshi toqsanda ortalyqtandyrylǵan sýmen jabdyqtaý nysandarynan sanıtarııalyq-hımııalyq kórsetkishter boıynsha zertteý úshin 463 synama alyndy.
BQO sanıtarııalyq-epıdemıologııalyq baqylaý departamenti basshysynyń orynbasary Gúldana Kereevanyń málim etkenindeı, zertteý nátıjesinde 26 synama nemese 5,6 paıyzy sáıkes kelmedi.
Onyń sózine qaraǵanda, sáıkessizdikter Aqjaıyq, Báıterek, Terekti aýdandarynda anyqtaldy.
— Mıkrobıologııalyq kórsetkishterge oblys boıynsha barlyǵy 452 synama zertteldi, sonyń bireýi (0,2 paıyzy) Jánibek aýdanynda talapqa saı bolmaı shyqty. Sonymen qatar ortalyqtandyrylmaǵan sý kózderi boıynsha sanıtarlyq-hımııalyq kórsetkishterge 19 synama alynyp, sonyń ekeýi Qaratóbe aýdanynda sáıkes kelmedi, — dedi G.Kereeva.
Onyń aıtýynsha, sáıkes kelmeıtin synamalar boıynsha sharýashylyq júrgizýshi sýbektilerge sýmen jabdyqtaý nysandaryn tazalaý, jýý jáne dezınfektsııalaý qajettigi týraly hattar jiberildi.
Oǵan qosa bıylǵy úsh aıda atmosferalyq aýanyń jaı-kúıine monıtorıng júrgizý úshin 8 133 synama alynyp, sanıtarııalyq-hımııalyq kórsetkishterge zertteldi, onyń ishinde shekti ruqsat etilgen kontsentratsııadan aýytqý anyqtalmady.
Departament málimetine sáıkes sanıtarııalyq-epıdemıologııalyq monıtorıng aıasynda syrtqy qorshaǵan ortadan (sý, topyraq, atmosferalyq aýa) synamalardy irikteý toqsanyna keminde bir ret júrgiziledi. Oblys boıynsha sýmen jabdyqtaý boıynsha baqylaý núkteleriniń barlyǵy 765 bolsa, sonyń 721-i — ortalyqtandyrylǵan, 44-i — ortalyqtandyrylmaǵan sý kózderi.
Atmosferalyq aýa synamalaryn irikteýdegi baqylaý núkteleriniń sany — 345.
Eske sala keteıik, budan buryn Batys Qazaqstanda sýdan alynǵan synamalar sáıkessizdik bar ekenin kórsetkenin jazǵan edik.
