BQO-nyń Bórli aýdanynda 7,2 mlrd teńgeniń memlekettik satyp alý konkýrstarynyń kúshi joıyldy
ORAL. KAZINFORM – Batys Qazaqstan oblysy Bórli aýdanynyń prokýratýrasy jalpy somasy 7,2 mlrd teńgeden astam memlekettik satyp alýlardy joıý arqyly 826,3 mln teńge somasynda bıýdjet qarajatynyń negizsiz jumsalýyna jol berilmedi.
Batys Qazaqstan oblystyq prokýratýrasy baspasóz qyzmetiniń habarlaýynsha, 2026 jyldyń 21 qańtarynda memlekettik satyp alýlar portalynda Bórli aýdany ákimi apparatynyń BQO, Bórli aýdany, Aqsaı qalasyndaǵy avtomobıl joldaryn kútip-ustaý jáne aǵymdaǵy jóndeý boıynsha (Ońtústik jáne Soltústik bólikteri, sondaı-aq Qyzyltal sh/a) jalpy somasy 7,2 mlrd teńgege memlekettik satyp alýlar jarııalanǵan.
Atalǵan jumystar kógaldandyrýdy (kógal otyrǵyzý, aǵashtar men gúlder egý jáne olardy kútip-baptaý) qarastyrǵanymen konkýrs qujattamasy «Ósimdikter dúnıesi týraly» Zańnyń mindetti talaptaryna sáıkes kelmegeni anyqtaldy.
Atap aıtqanda, josparlanǵan kóshet otyrǵyzý men kógaldar jasaýǵa qatysty dendrologııalyq jospar jáne kógaldandyrý jumystarynyń kólemi men qunyn aıqyndaý úshin qajetti defektilik akt bolmaǵan.
Sonymen qatar, kógaldandyrý jumystary jeke lot retinde bólinbegen, al jumystardy oryndaý ýchaskeleri men naqty mekenjaılary qujattamada naqtylanbaǵan.
Esepteýlerge sáıkes atalǵan is-sharalarǵa 826,3 mln teńge qarajat qarastyrylǵan.
Atap ótý qajet, dendrologııalyq jospar kógaldandyrýdy josparlaýdyń negizi bolyp tabylady, onda qoldanystaǵy jasyl qordy, túrlik quramdy jáne ornalastyrýdy eskere otyryp, otyrǵyzýǵa nemese kútim jasaýǵa jatatyn ósimdikterdiń sany kórsetiledi. Mundaı josparlar bolmaǵan jaǵdaıda josparlanǵan kóshet otyrǵyzý qajettiligin, otyrǵyzylatyn tuqymdardyń negizdiligin jáne jumystardyń naqty ýchaskelerge baılanysyn rastaý múmkin emes.
-Anyqtalǵan zańbuzýshylyqtar jumystardyń kólemin negizsiz aıqyndaýǵa, satyp alýdyń ashyqtyǵyn tómendetýge jáne bıýdjet qarajatyn tıimsiz jumsaýǵa, onyń ishinde tıisti bastapqy qujattarsyz jáne naqty ýchaskelerge baılanyssyz jumystarǵa aqy tóleý táýekelderine jaǵdaı jasaǵan,-delingen habarlamada.
Prokýrorlyq qadaǵalaý aktisi boıynsha memlekettik satyp alýlardyń kúshi joıylyp, nátıjesinde negizsiz jalpy somasy 826,3 mln teńge somasynda bıýdjet qarajatynyń jumsalýyna jol berilmedi.
Osyǵan deıin SQO-da memlekettik satyp alý talaptary buzylyp, 11,2 mln teńge qaıtarylǵany týraly jazdyq.