BQO-nyń Bókeı ordasy aýdanynda tótenshe jaǵdaı jarııalandy

ORAL. KAZINFORM – Batys Qazaqstan oblysy Bókeı ordasy aýdanynda borannan keıin qalpyna keltirý jumystary júrgizilip jatyr. 

Aýdan ákimdiginen málim etkenindeı, 13-14 jeltoqsanda kún raıy kúrt buzylyp, boran kezinde bir adam joǵalyp ketip, keıin máıiti tabyldy.

Sondaı-aq 5 turǵyn úı men 4 áleýmettik nysannyń shatyrlary ushty.

Osyǵan oraı aýdan ákimi Nurlybek Daýmovtyń tóraǵalyq etýimen aýdandyq tótenshe jaǵdaılardyń aldyn alý jónindegi komıssııa otyrysy ótkizildi. Aýdan ákiminiń 15 jeltoqsandaǵy № 7 sheshimimen Bókeı ordasynda tabıǵı sıpattaǵy tótenshe jaǵdaı jarııalandy. 

— Kúni búgin áleýmettik nysandardyń shatyrlaryn jóndeý jumystary bastalyp, jeke turǵyndardyń ótinishteri qabyldanyp jatyr. Aýdan ortalyǵy Saıqyn aýylynda rezervtik sý munarasynyń rezervýaryn jańadan satyp alý úshin oblystyq energetıka, turǵyn úı-kommýnaldyq sharýashylyq basqarmasyna ótinim berildi. Aýyz sý berý shtattyq rejımde júzege asyrylýda. Qazirgi ýaqytta barlyq eldi mekenderge elektr qýaty tolyqtaı berildi, — dep habarlady aýdan ákimdiginen.

Eske sala keteıik, budan buryn BQO-da sý munarasy qulap, bir adamnyń joǵalyp ketkenin jazǵan edik.

Sondaı-aq BQO-da boranda joǵalyp ketken úsh adamnyń denesi tabyldy.