BQO men SQO-da sottalǵan 1700-den astam adam elimizdiń basqa mekemelerine jetkizildi
ASTANA. KAZINFORM – Ulttyq ulan qaraýyldary sý basý qaýpine baılanysty BQO men SQO-da 1700-den astam sottalǵandardy elimizdiń basqa mekemelerine jetkizdi.
QR Ulttyq ulany baspasóz qyzmetiniń málimetinshe Tótenshe jaǵdaılar aıasynda Ulttyq ulan bólimsheleri sý basý qaýpi bar aýdandarǵa jatatyn eldi mekenderdiń turǵyndaryna kómek kórsetý jónindegi sharalardy oryndap jatyr. Sonymen qatar muny óz betinshe jasaı almaıtyn adamdardy evakýatsııalap jatyr.
Dálirek aıtsaq, Batys Qazaqstan oblysyndaǵy sý tasqyny jaǵdaıynyń nasharlaýyna jáne qylmystyq-atqarý júıesi mekemeleriniń (budan ári – QAJ) sý basý qaýpine baılanysty sottalǵandardy Oral qalasynyń №27 QAJ-nan Qazaqstan boıynsha basqa túzeý mekemelerine áketý týraly sheshim qabyldandy.
Osyǵan baılanysty, 7552 (Almaty q.), 6505 (Qaraǵandy q.) jáne 6655 (Aqtóbe q.) áskerı bólimderiniń Ulttyq ulanynyń áskerı qyzmetshileri qysqa merzimde Oral qalasynan 700-ge jýyq sottalǵandardy temir jol qaraýylymen shyǵardy. Olardy tasymaldaý úshin arnaıy avtomobılder men temirjol vagondary tartyldy. Hattama boıynsha barlyq qajetti rásimderdi júzege asyrý úshin quqyqtyq tártip áskerleriniń 400-den astam áskerı qyzmetshisi jumyldyryldy.
Ótken aptanyń sońynda Qazaqstannyń soltústiginde sottalǵandardy osyndaı tasymaldaý júrgizilgenin atap ótken jón. Máselen, Petropavl qalasynyń №48 QAJ mekemesin sý basý qaýpine baılanysty osy oblys ortalyǵyndaǵy áıelder kolonııasyna (№50 QAJ) 750-den astam sottalǵan er adamdardy ornalastyrý týraly sheshim qabyldandy. Biraq, árıne, aldymen 300-den astam barlyq áıel odan shyǵaryldy.
Qazirgi ýaqytta sottalǵan áıelder Qaraǵandy oblysyndaǵy Kóksún kentindegi QAJ mekemelerine jetkizildi. Petropavl qalasynyń TIZO-da qamaýda otyrǵan adamdarǵa qatysty osyndaı sharalar qabyldandy jáne olar Kókshetaý qalasyna shuǵyl evakýatsııalandy.
