BQO men Reseıdiń Penza oblysy ózara yntymaqtastyqty nyǵaıtpaq
ORAL. QazAqparat - Búgin Penza oblysynyń úkimeti men Batys Qazaqstan oblysynyń ákimdigi ekonomıkalyq, ǵylymı-tehnıkalyq jáne mádenı yntymaqtastyq týraly kelisimge qol qoıdy. Bul kelisim Chelıabi qalasynda Reseı jáne Qazaqstan elderi basshylarynyń qatysýymen ótip jatqan XIV óńiraralyq yntymaqtastyq forýmy aıasynda jasaldy, dep habarlaıdy «QazAqparat» tilshisi.
Osy jıynǵa qatysqan BQO ákimi Altaı Kólginov óńiraralyq forýmnyń eki el úshin de tıimdiligi mol ekendigin jetkizdi.
«Biz úshin Penza oblysynyń ІT tehnologııa, medıtsına, farmatsevtıka, aýyl sharýashylyǵy salasynda júzege asyryp jatqan jobalary óte qyzyqty. Óıtkeni Batys Qazaqstan oblysynda da mashına jasaý, aýyl sharýashylyǵy salasy jaqsy jolǵa qoıylǵan. Sondyqtan búgin biz jasasqan kelisimniń aýqymy keń, kóp salany qamtıdy. Qazirdiń ózinde eki oblystyń ókilderi bir-birimizge baryp, tájirıbe almasý jóninde ýaǵdalastyq. Jalpy, mundaı sharalar jaqyndastyra túsedi dep oılaımyn. Mysaly, byltyr Astana qalasynda qos memleket basshysy N.Nazarbaev pen V.Pýtınniń qatysýymen ótken forýmda Batys Qazaqstan oblysyna qatysty eki qujatqa qol qoıylǵan bolatyn. Onyń biri júrdek poıyzdardy iske qosý jáne eki el shekarasyndaǵy tekseristerdi alyp tastaý bolsa, ekinshisi Jaıyq ózenine qatysty. Búginde júrdek poıyzdar arqyly qatynaý turǵyndarǵa óte qolaıly bolyp otyr. Bir sózben aıtqanda, halyq osyndaı kelisimder negizinde júzege asatyn sharalardyń ıgi jemisin kórýde», - dedi A.Kólginov.
Aıta keteıik, 2003 jyldan beri dástúrli túrde uıymdastyrylyp kele jatqan forýmnyń maqsaty - eki eldiń arasyndaǵy túrli saladaǵy yntymaqtastyqty bekitip, saýda-ekonomıkalyq, ǵylymı-tehnıkalyq jáne mádenı baılanystardy nyǵaıtý.
Geografııalyq ornalasýy jaǵynan qolaıly ári tarıhı baılanysy tereńde jatqan eki memlekettiń arasyndaǵy saýda-ekonomıkalyq qarym-qatynastar óte tyǵyz. Máselen, Reseı eliniń bes birdeı óńirimen shektesetin Batys Qazaqstan oblysynyń ózinde Reseı bıznes ókilderiniń qatysýymen 160-tan asa kásipkerlik nysandary jumys jasaıdy. Sondaı-aq sońǵy úsh jyldyń ishinde tek Batys Qazaqstan oblysynyń Eýrazııalyq ekonomıkalyq odaqpen aradaǵy taýar aınalymy 2 mlrd AQSh dollaryn qurasa, bıyldyń ózinde Reseı elimen sondaı saýda-sattyq kólemi 400 mln dollarǵa jetip, 40 paıyz ósimdi kórsetip otyr.
Forým aıasynda Qazaqstan men Reseı Federatsııasy oblystarynyń arasynda ózge de arnaıy kelisimder jasaldy.
Forým taqyryby «Adam kapıtalyna ınnovatsııalar engizý» bolǵandyqtan, munda eki memlekettiń oqý oryndary men ǵylymı ortalyqtarynyń arasyndaǵy baılanys máselesi de talqylandy. Qazirdiń ózinde Batys Qazaqsan oblysynyń birneshe oqý oryndary men Reseı oqý oryndarynyń arasyndaǵy baılanys jaqsy. Stýdenttermen akademııalyq almasý, ǵalym-ustazdardyń tájirıbe bólisýi maqsatyndaǵy sharalar kóptep júzege asýda. Sonyń ishinde M.Ótemisov atyndaǵy Batys Qazaqstan memlekettik ýnıversıteti men Penza memlekettik ýnıversıtetiniń arasynda arnaıy kelisim jasalǵan.
