BQO-men kórshiles Reseı oblystarynda koronavırýs kóp tirkelip otyr

ORAL. QazAqparat – Batys Qazaqstanmen kórshiles Reseı oblystarynda koronavırýs kóp tirkelip otyr. Bul týraly oblys ákimi Ǵalı Esqalıevtiń tóraǵalaǵymen ótken koronavırýstyń aldyn alý jónindegi oblystyq jedel shtab otyrysynda aıtyldy, dep habarlaıdy QazAqparat tilshisi.

Onda óńir basshysy atap ótkenindeı, sarapshy mamandardyń kúz aılarynda koronavırýstyń órshıtini týraly boljamy rastala bastady.

«Damyǵan elderde koronavırýsqa tosqaýyl qoıý maqsatynda qatań karantındik sharalar qabyldanýda. Bizdiń óńirmen kórshiles Reseı oblystarynda turǵyndar arasynda indettiń ósýi alańdatpaı qoımaıdy. Ótken kóktemde de koronavırýs juqtyrǵandar bastapqyda Reseı men Atyraý oblysyndaǵy Teńiz kenishinen kelgender arasynan kóp tirkelgen bolatyn. Sondyqtan saqtyq sharalaryn kúsheıtý kerek», dedi Ǵ.Esqalıev.

Oblystyq densaýlyq saqtaý basqarmasynyń basshysy Bolatbek Qaıýpovtyń aıtýynsha, maýsymdyq aýrýlarǵa baılanysty koronavırýstyń ekinshi tolqyny qaýip tóndirip otyrǵanyn kórshiles elderge, ásirese, Reseıge qarap kórýge bolady. Reseıdegi koronavırýspen aýyrǵandar sany mamyrdaǵy deńgeıge jetti. Táýligine 10 myńnan astam indet juqtyrǵandar anyqtalýda. Sonyń ishinde Batys Qazaqstanmen kórshiles Orynbor oblysynda táýligine – koronavırýske shaldyqqan 115, Samarada – 114, Saratovta – 128, Volgogradta 129 adam tirkelip otyr.

«Qazirgi tańda koronavırýstyń ekinshi tolqynyna barynsha daıyndalýdamyz. Dári-dármek qoryn jasaqtap, kadrlar men statsıonardy, jedel járdem bólimshesin ázirledik. Ótkennen sabaq alyp, bárin de eskerýge tyrysýdamyz. Alaıda turǵyndar óz densaýlyǵyna jaýapty qarap, ózderi men jaqyndaryn indetten saqtaýǵa mán bermese, mundaı daıyndyqtyń esh ketýi yqtımal», dedi B.Qaıýpov.

BQO taýarlar men kórsetiletin qyzmetterdiń sapasy men qaýipsizdigin baqylaý departamentiniń basshysy Muhamǵalı Aryspaevtyń málim etkenindeı, óńirde ótken qyrkúıek aıynda 111 turǵyn koronavırýs juqtyrsa, sonyń 33-i Oral qalasy, 11-i Terekti, 9-y Báıterek aýdanynyń úlesine tıedi.

M.Aryspaev indettiń aldyn alý maqsatynda Reseımen shekarada ornalasqan barlyq ótkizý beketteriniń sanepıdemıolog mamandardyń aıryqsha baqylaýyna alynatyn jetkizdi.

Otyrysta jeke qorǵanys quraldarynyń jetkilikti jáne qoljetimdi baǵamen satylyp jatqany aıtyldy.

Ǵ.Esqalıev turǵyndar arasynda indettiń taralmaýy úshin qoǵamdyq kólikke jolaýshylardyń tek betperdemen kirýin qamtamasyz etý, kópqabatty úılerde jylýdy ádettegiden bir apta buryn berý jáne basqa qaýipsizdik sharalaryn kúsheıtý qajettigin atap kórsetti.

Eske sala keteıik, budan buryn Batys Qazaqstanda koronavırýspen aýyrǵan 4 balanyń jazylyp shyqqanyn jazǵan bolatynbyz.