BQO-men kórshiles Reseı aımaqtaryndaǵy qulpytastardy zertteý oılastyrylýda - Aıtjan Nurmanova
ORAL. QazAqparat - Aldaǵy ýaqytta Batys Qazaqstanmen kórshiles Astrahan sekildi Reseı oblystary aýmaǵyndaǵy qulpytastardy zertteý oılastyrylýda. Bul týraly búgin «Jaıyq Press» JShS-da ótken basqosýda Almaty qalasyndaǵy R.B.Súleımenov atyndaǵy Shyǵystaný ınstıtýtynyń jetekshi qyzmetkeri, tarıh ǵylymdarynyń kandıdaty, qulpytastardy zertteý jónindegi joba jetekshisi Aıtjan Nurmanova málim etti, dep habarlaıdy «QazAqparat» tilshisi.
Onyń aıtýynsha, buǵan deıin qolǵa alynǵan «Qazaq halqynyń mádenı eskertkishteri - rýhanı murany saqtaý men jetkizýdiń joly (Batys Qazaqstan oblysynyń epıgrafııalyq eskertkishteri negizinde)» atty úsh jyldyq joba bıyl márege jetedi. Sondyqtan aldaǵy jyldan bastap taǵy úsh jylǵa eseptelgen jańa jobany qolǵa alý oılastyrylýda. Eger Úkimet tarapynan qoldaý tapsa, ǵalymdar Reseıdiń kórshiles aımaqtaryna da saparǵa shyǵatyn bolady. Bıyl Batys Qazaqstanda jasalǵan jumystar qorytyndylanyp, birneshe tilde ǵylymı jınaqtar jaryq kóredi. Kúni búgin kitaptyń alǵashqy nusqasy jasaldy. Osy jolǵy saparda sondaǵy keıbir dálsizdikterdi anyqtaý jumystary júrgiziledi. Buǵan deıin Máýlimberdi, Jantóre, Jáńgir han qorymdary zerttelgen edi. Endi almatylyq ǵalymdar ǵylymı-zertteý jumystaryn jalǵastyrý úshin Jáńgir han zıraty oryn tepken Bókeı ordasy aýdanyna jol júrmekshi.
«Jalpy, Bókeı ordasy tarıhyn zertteýge Reseı, Japonııa jáne AQSh ǵalymdary qyzyǵýshylyq tanytýda. Alaıda olar syrtqy (reseılik) derekter negizinde zertteıdi. Bul birjaqty kózqaras bolyp keledi. Biz ishki derekterdi ǵylymı aınalymǵa qosqymyz keledi. Tarıh ǵylymynyń bir bóligi - qulpytastar. Sondyqtan adamnyń jeke basyna qatysty málimetter ǵana emes, sol kezdegi memlekettik saıasat kórinis taýyp, dinı, rýhanı ıdeologııa qashalǵan, aıat-súreler men joqtaý óleńderge deıin jazylǵan qulpytastardy joıylyp ketpeı turǵanda, «tiriltý» kerek. Qazaqstan, sonyń ishinde handarymyzdyń tarıhy tolyq zerttelip boldy dep aıta almaımyz. Ǵalymdar ortaq pikirge kele almaǵan tulǵalar jetkilikti. Sol sebepti Elbasymyzdyń «Bolashaqqa baǵdar: rýhanı jańǵyrý» baǵdarlamalyq maqalasynda aıtylǵanyndaı, kıeli jerlerdi ǵylymı túrde barynsha keńinen zerttep, jaryqqa shyǵarýdyń mańyzy zor», dedi Aıtjan Nurmanova.
«Jaıyq Press» JShS bas dırektory Jantas Safýllınniń sózine qaraǵanda, almatylyq ǵalymdarǵa jergilikti mamandar qolushyn berýde. Qazirdiń ózinde óńirdegi úsh myńdaı qulpytas sýretke túsirilip, hattaldy. Sonyń teń jartysynan astamyndaǵy arab qarpimen jazylǵan mátindi mamandar oqyp, kırıllıtsaǵa aýdardy.
