BQO memlekettik sáýlet-qurylys baqylaýy basqarmasyna jańa basshy taǵaıyndaldy

ORAL. QazAqparat - Buǵan deıin «Gosekspertıza» RMK BQO fılıaly dırektory qyzmetin atqaryp kelgen Baýyrjan Bolatuly Seıtqalı Batys Qazaqstan oblysy memlekettik sáýlet-qurylys baqylaýy basqarmasynyń basshysy bolyp taǵaıyndaldy, dep habarlaıdy «QazAqparat» tilshisi.

Oblys ákimi Altaı Kólginov basqarma ujymyna jańa basshyny tanystyryp, qyzmetine tabys tiledi.

Baýyrjan Seıtqalı 1981 jyly dúnıege kelgen. 2002 jyly M.Ótemisov atyndaǵy Batys Qazaqstan memlekettik ýnıversıtetin, 2007 jyly Jáńgir han atyndaǵy Batys Qazaqstan agrarlyq-tehnıkalyq ýnıversıtetin bitirgen.

B.B.Seıtqalı eńbek jolyn 2002 jyly Batys Qazaqstan elektr jelilerin taratý kompanııasynda zań keńesshisi bolyp bastady. Sodan keıin 2003-2004 jyldary «Qurylyskonsaltıng» UO» AAQ BQOF bas mamany, 2004-2005 jyldary osy fılıal dırektorynyń orynbasary, 2005-2007 jyldary Batys Qazaqstan oblysy memlekettik sáýlet-qurylys baqylaýy basqarmasynyń bas mamany, 2007-2008 jyldary osy basqarmanyń bólim basshysy, 2008-2011 jyldary basqarma basshysynyń orynbasary, 2011-2014 jyldary QR Qurylys jáne turǵyn úı-kommýnaldyq sharýashylyq isteri komıteti Batys Qazaqstan oblysy memlekettik sáýlet-qurylys baqylaý jáne lıtsenzııalaý departamenti dırektorynyń orynbasary boldy.

2014 jyldan «Gosekspertıza» RMK BQO fılıaly dırektory qyzmetin atqaryp keldi.