BQO Memkirister departamenti «Syrym» beketinde júk kólikteriniń jedel ótýine qatysty shara qabyldaýda
Memlekettik kirister departamenti júk kólikterin tezdetip ótkizý úshin barlyq sharanyń qabyldanyp otyrǵandyǵyn habarlady.
BQO Memlekettik kirister departamentinen túsken málimetke qaraǵanda, «Syrym» beketiniń qazaqstandyq bóliginde júk kólikteriniń kezekte turyp qalýyna baılanysty 18 qańtar kúni saǵat 17.00-de aýysymdaǵy adamdar sany 4-ke jáne 1 skanerleý tehnıkasyna kóbeıtilgen.
Táýlik boıy shekarashylarmen birlesip jumys jasaý nátıjesinde «Syrym» beketinde 18 qańtar kúni saǵat 19.00-den 19 qańtar kúni saǵat 07.00-ge deıin 311 júk kóligi tirkelip, monıtorıngten ótkizilgen. Osy kúni saǵat 10.00-de «Syrym» beketiniń qazaqstandyq bóliginde 62 júk kóliginiń kezek kútip turǵany belgili boldy.
BQO Memlekettik kirister departamenti basshysynyń orynbasary Nurbolat Abdýlov «Syrym» beketiniń salynǵanyna biraz ýaqyt ótkendigin, qazirgi kezde sonyń múmkindigine qaraı barlyq sharalar qabyldanyp jatqandyǵyn atap ótti. Sonymen qatar kezektiń kóbeıýine jańajyldyq demalystardan keıin júk kólikteriniń jıileı túskendigi de áser etkendigin jetkizdi.
Eske sala ketsek, buǵan deıin Memlekettik kirister komıtetiniń qyzmetkerleri shekarada taýar tekseretini jóninde habarlaǵan bolatynbyz.
Komıtettiń eksporttyq baqylaý basqarmasynyń jetekshisi Ánýar Mádıevtiń aıtýynsha, 37 avtobekette 277 adam jumys istep júr. Olarǵa birneshe mindet júktelgen. Birinshiden, komıtet qyzmetkerleri eksporttyq baqylaýǵa jatatyn taýarlardy qadaǵalaıdy. Ekinshiden, bajdyń tómendetilgen mólsherlemesine kiretin taýarlardy tekseredi. Ondaı taýarlarǵa 3 myńǵa jýyq ónim kiredi. Úshinshiden, Eýrazııalyq ekonomıkalyq odaq aıasynda taýarlardy satý, jumystardy oryndaý jáne qyzmet kórsetý kezinde ımportqa qosylǵan qun salyǵynyń tolyq túsýin baqylaıdy.
