BQO mektepterine vıdeokameralar ornatylyp jatyr

ORAL. QazAqparat – Memleket basshysynyń tapsyrmasyna sáıkes Batys Qazaqstan oblysynda mektepter men balabaqshalardy beınebaqylaý júıesimen qamtamasyz etý jumystary qolǵa alyndy, dep habarlaıdy QazAqparat tilshisi.

Oblys ákimi Ǵalı Esqalıev málim etkenindeı, sondaı-aq bilim nysandarynyń sanıtarlyq talaptarǵa saı bolýy úshin jaǵdaı jasalýda.

Oqýshylardyń qaýipsizdigin qamtamasyz etý maqsatynda dárethanalardy mektep ishine ornatý jumystary júrgizildi. Atap aıtqanda, 310 mln teńgege 139 oqý mekemesinde mektepishilik dárethana, 206 mln teńgege beınebaqylaý kameralary ornatyldy.

Óńir basshysynyń sózine qaraǵanda, taǵy bir mańyzdy másele – jol qaýipsizdigi. Ótken jyl sońynda Oralda kósheniń qarańǵy tusynda kólik qaǵyp ketken 10 jasar qyzdyń kóz jumǵany belgili. Sondaı qaıǵyly oqıǵanyń qaıtalanbaýy úshin qala ákimdigine arnaıy komıssııa quryp, shahardyń qaýipti tustaryn anyqtaý tapsyrylǵan bolatyn.

«Qazirgi tańda qalanyń úlken kóshelerine 4 myńǵa jýyq jaryq shamy ornatylsa, 8 qaýipti qıylysqa baǵdarsham qoıyldy. Jyl sońyna deıin taǵy 15 myń jaryq shamyn aýystyrý josparda tur. 62 jaıaý júrginshi jolyn jaryqtandyrý jumystary 1 qyrkúıekke deıin aıaqtalady», dedi Ǵ.Esqalıev.

Oral qalasynda balalar zardap shegetin jol-kólik apattaryn boldyrmaý maqsatynda 20 mektep janyna baǵdarsham ornatylyp, jaıaý júrginshiler jolaǵy jasaldy. Mundaı jumystar aýyl mektepteri mańynda da júrgizilýde.

Eske sala keteıik, budan buryn BQO-da 4,5 mlrd teńgege 33 bilim nysany kúrdeli jóndelip jatqanyn jazǵan bolatynbyz.