BQO mektepterine «Bilim book» júıesi engizilmek
Memleket basshysy qabyldaǵan «Tsıfrlyq Qazaqstan» baǵdarlamasy aıasynda bilim berý salasyn da tsıfrlandyrýdyń mańyzdylyǵyn atap ótken óńir basshysynyń aıtýynsha, oblysta 444 eldi mekenniń 152-si (35 paıyzy) ınternetke qosylmaǵan. Oǵan qosa mektepter, medpýnktter men basqa áleýmettik nysandar bar. Sonyń bárin ınternetke qosý josparǵa engizildi.
Osy oraıda «Qazaqtelekom» AQ basqarma tóraǵasy Qýanyshbek Esekeevpen jol kartasyna qol qoıyldy. Bul rette densaýlyq saqtaý, bilim berý mekemelerin tsıfrlandyrýǵa barynsha mán beriledi. Ásirese, shalǵaı aýyldardaǵy shaǵyn mektepter aıryqsha nazar aýdarýdy qajet etedi. Qazirgideı jappaı damý kezeńinde ol bilim oshaqtary qala mektepterinen kem bolmaýy kerek. Sondyqtan 220 shaǵyn mektepke «Bilim book» elektrondy júıesin engizýge qarjy bólinip, memlekettik satyp alý jumystary júrgizilýde. 1 qyrkúıekte ol mektepter jańa kompıýterlermen, baǵdarlamasymen qamtylady. Aýdan ortalyqtaryndaǵy mektepterde shákirtter elektrondy baǵdarlamalardy, jańa tehnologııalardy tolyq qoldanatyn bolady.
Altaı Kólginovtiń sózine qaraǵanda, QR Aqparat jáne kommýnıkatsııalar mınıstrligimen birigip jasalǵan josparǵa sáıkes taıaýdaǵy úsh jylda ınternet máselesin sheshý kózdelýde. Atap aıtqanda, 100 eldi meken keń jolaqty ınternetke qosylyp, tsıfrlandyrý jumystaryna jol ashylady. Bul oqýshylar men muǵalimderdiń tsıfrlyq júıede bilim alyp, jumys jasaýyna múmkindik beredi. Sondaı-aq, «Qaýipsiz aýla» jobasy aıasynda «Qazaqtelekom» AQ-men birge Oralda 2 myń beınekamera ornatylady. Bul 200 kóp qabatty úıdi nemese 1 myń kireberisti qamtıdy.
Jıynda «Qazaqtelekom» AQ basqarma tóraǵasy Qýanyshbek Esekeev aldaǵy eki jylda Batys Qazaqstan oblysynyń bes aýdan ortalyǵyn optıkalyq-talshyqty baılanys jelisine qosý josparlanyp otyrǵanyn jetkizdi.
«BilimmediaGroup» JShS-nyń dırektory Raýan Kenjehanuly, «Knowledge Egineering» JShS-nyń dırektory Nartaı Áshim «Bilim berýdegi zamanaýı trendter» jáne «Muǵalimderdiń kásibı biliktiligin arttyrýǵa arnalǵan sandyq resýrstar» taqyryptarynda óz oı-tájirıbelerimen bólisti.
Sonymen qatar sessııa barysynda R.Kenjehanuly Ulttyq aýdarma bıýrosynyń basshysy retinde «Rýhanı jańǵyrý» baǵdarlamasy aıasynda shyqqan 18 jańa oqýlyqtyń tanystyrylymyn óńirler arasynda birinshi Batys Qazaqstan oblysynda ótkizdi.
«Bilim book» jobasy shaǵyn mektepterge yńǵaıly. Onda kompıýter jadyna qajetti bilim resýrsy salynǵan. Internettiń qajeti joq. Bir synypta 15 baladan bilim alatyn bolsa, muǵalim olardyń árqaısysyna ár túrli elektrondyq tapsyrma bere alady. Bala sabaqty ıgermeıinshe, baǵdarlamamen alǵa jyljı almaıdy. Muny biz elimizdiń úsh shaǵyn mektebinde tájirıbeden ótkizip kórdik. Nátıjesi oıdaǵydaı. Bıyl Batys Qazaqstandaǵy shaǵyn mektepterde osy jumys qolǵa alynady. Basty maqsat - alys aýyldardaǵy mektepterde bilim sapasyn kóterý, - dedi R.Kenjehanuly.
Aıta keteıik, tsıfrlandyrý aıasynda óńir muǵalimderiniń kásibı biliktiligin jetildirý baǵytynda mundaı jıyndar turaqty uıymdastyrylatyn bolady.
