BQO mektepterinde JRVI-men aýyrǵandar sany 2500-den asty
BQO sanıtarlyq-epıdemıologııalyq baqylaý departamentiniń basshysy Muhamǵalı Aryspaevtyń óńirlik kommýnıkatsııalar qyzmeti alańynda ótken brıfıngte málim etkenindeı, JRVI-men barlyǵy 468 adam aýrýhanaǵa jatqyzylsa, sonyń 244-i – 1 jasqa deıingi sábıler, 89-y – júkti áıelder.
Sondaı-aq 50 adam (12-si – júkti áıel) tumaýmen, 45 adam (28-i – 14 jasqa deıingiler, 12-si – 1 jasqa deıingi sábıler, bireýi – júkti áıel) pnevmonııamen aýrýhanaǵa túsken.
M.Aryspaevtyń sózine qaraǵanda, bıylǵy 1 qazanan bastap JRVI-men syrqattanǵandar sany oblysta 15 paıyzǵa, sonyń ishinde 14 jasqa deıingiler arasynda 62,7, júkti áıelder boıynsha 10,2 paıyzǵa ósip ketip otyr.
Sonymen qatar bıyl tumaý erte órship, alǵashqysy 31 qyrkúıekte anyqtaldy. Oblys boıynsha barlyǵy 72 adamnyń tumaýǵa shaldyqqany zerthanalyq túrde rastaldy. Sonyń ishinde 63-iniń adamnyń tumaýdyń V shtamy, 9 adamnyń A (H1N1) shtamymen aýyrǵany tirkeldi. 14 jasqa deıingi 28 jasóspirim, 12 júkti áıel tumaýmen syrqattandy.
Departament basshysynyń aıtýynsha, tumaýǵa uqsas vırýstarǵa tekserilgen 109 synamanyń 66-synda mynadaı vırýstar anyqtaldy: RS vırýsy – 21, rınovırýs – 17, adenovırýs – 16, bokovırýs – 4, paragrıpp – 4, koronavırýs – 3, metanopnevmovırýs – 1.
M.Aryspaev oblysta jyl basynan beri 13 038, sonyń ishinde jeltoqsanda 176 adamnyń koronavırýspen aýyrǵanyn jetkizdi. Bulardyń 85 paıyzy Oral qalasynyń úlesine tıedi.
«Jýyrda oqýshylardyń qysqy demalysy bastalady. Osyǵan baılanysty balalar arasynda JRVI juqtyrý deńgeıi tómendeıdi dep oılaımyz. Sondyqtan qatań shekteý sharalary engizilmeıdi. Degenmen jańajyldyq merekeler kezinde tumaý, JRVI jáne koronavırýstan saqtaný úshin betperdeler men antıseptıkterdi qoldanyp, adamdar kóp jınalatyn oryndarǵa barmaý, naýqas adamdarmen qarym-qatynasty shekteý kerektigin eske salamyz. Úıdi jeldetip, únemi tazalaý jumystaryn júrgizip, aýrý baıqalǵan boıda medıtsınalyq kómekke júginý qajet», dedi M.Aryspaev.