BQO mektepterinde úsh aýysym máselesi qalaı sheshilip jatyr
ORAL. QazAqparat – BQO-da úsh aýysymdyq jáne apattyq jaǵdaıdaǵy mektepter máselesi sheshilýde, dep habarlaıdy QazAqparat tilshisi.
Oblys ákimi Ǵalı Esqalıevtiń aıtýynsha, Prezıdent bıylǵy Joldaýynda bilim berý sapasyn odan ári damytý baǵytynda mektepterde tolyq jaǵdaı jasaýdy tapsyrǵan bolatyn.
«Memleket basshysy 29 qyrkúıek kúni qabyldaǵan kezde úsh aýysymdyq jáne apatty jaǵdaıdaǵy mektepter máselesi de sheshiletinin málimdedim», dedi óńir basshysy.
Onyń aıtýynsha, bıylǵy jyl basynda 7 úsh aýysymdyq jáne 7 apattyq jaǵdaıdaǵy mektep boldy. Bıyl bes, kelesi jyly eki mektepte úsh aýysymdyq máselesin sheshý kózdelýde. Osy maqsatta bıyl 450 oryndyq mektep ǵımaraty paıdalanýǵa berilip, oǵan estetıkalyq baǵyttaǵy gımnazııa kóshirildi.
Jańa ǵımarat salý esebinen apattyq jaǵdaıdaǵy eki mekteptiń máselesi bıyl sheshimin tabady. Qalǵan apatty mektepterdi 2021-2022 jyldary sheshý josparlanýda.
Jalpy, bıyl oblys boıynsha 8 mlrd teńge qarajatqa 6 mekteptiń qurylysy júrgizilýde. Oǵan qosa memlekettik baǵdarlamalar aıasynda 4,5 mlrd teńgege Oral qalasy men aýdandarda 33 bilim berý nysany kúrdeli jóndelýde.
Mektep máselesin sheshý úshin jeke ınvestorlar tartylyp, bıyl eki mekteptiń qurylysy bastalady («Kaz-Holl» JShS, Oral qalasynyń №31 mektebi, «Nýrkapstroı» JShS, Oral qalasynyń №52 mektebi).
Ákimniń sózine qaraǵanda, oblys boıynsha mektepke deıingi uıymdarda 30 myńnan astam bala tárbıelenýde. 3 jastan 6 jasqa deıingi balalardy mektepke deıingi tárbıemen qamtý 100, 1-6 jastaǵy balalar 70 paıyz qamtamasyz etilgen.
Oqýshylardyń bos ýaqytyn tıimdi uıymdastyrý maqsatynda otbasylyq, týrıstik, ekologııalyq, tehnıkalyq baǵyttaǵy sharalar qashyqtan uıymdastyrylyp, oblys boıynsha 50 myńnan astam oqýshy qamtyldy.
Shyńǵyrlaý aýdanynyń metodıkalyq kabıneti respýblıkalyq «Úzdik aýdandyq, qalalyq metodıkalyq kabınet» saıysynda jenimpaz atandy.
Al oblystyq bilim berýdi damytý metodıkalyq ortalyǵy oblystyq metodıkalyq kabınetter arasynda respýblıkalyq saıysta júldeli 2 oryn aldy.
Oblystyń 35 oqýshysy respýblıkalyq jáne halyqaralyq olımpıadalar men ǵylymı saıystardyń júldegeri boldy.
Sondaı-aq 29 oqýshy daryndy balalarynyń «Aıqanat» baıqaýynyń jeńimpazy atanyp, Tuńǵysh Prezıdent qorynyń grantyna ıe boldy. Bul kórsetkish boıynsha BQO respýblıka boıynsha kósh bastap keledi. Daryndy balalar Býrabaıda ornalasqan IQanat mektebinde (IQanat High School of Burabay) oqýlaryn jalǵastyrýda.
«Elde engizilgen jalpy karantındik jaǵdaıǵa baılanysty barlyq mektepter sanıtarlyq quraldarmen tolyq qamtamasyz etilip, kezeshi synyptar jumys isteýde», dedi Ǵ.Esqalıev.
