BQO: Metsenat bıznesin aýyldastaryna berip jatyr
Munda iri saýyqtyrý kesheni salynyp jatyr. Osy bastamany kóterip ári demeýshi bolyp otyrǵan - metsenat Serjan Idııatov.
«Fedorovka aýylynda saýyqtyrý keshenin salý - meniń jobam, ony ózim iske asyryp jatyrmyn. Qabyrǵasyn kóterip qoıdyq, qazir tóbesin jaýyp jatyrmyz. Jospar boıynsha 2019 jyly paıdalanýǵa beremiz», - deıdi bıznesmen.
Ol izgi ıdeıanyń týyndaý sebebin aıtty.
«Fedorovka aýyly - qoǵamdyq monshasy joq jalǵyz aýdan ortalyǵy. Keıbir aýdan ortalyqtarynda qos-qostan osyndaı keshen bar. Budan tys, Fedorovka - meniń týǵan aýylym. Sondyqtan osy jerde 100 adamǵa arnalǵan monsha salýǵa uıǵardym. Qyzmetter aıasyn keńeıtip, jabyq basseındi de qostyq. Óıtkeni bizdegi jaz qysqa. Budan tys, keshende jańa tehnologııalarmen as ázirleıtin pıtstserııada bolady», - deıdi metsenat.
Biraq bıznesmen bul keshen arqyly tabys tabýdy oılap otyrǵan joq.
«Keshenge jumsalǵan qarajattyń ótelýine birneshe jyl ketedi. Eger ony qalaǵa salǵanymda, shyǵyny az bolyp, jyldam óteletin edi», - deıdi S. Idııatov.
Fedorovka aýylynyń turǵyndary keshenniń salynyp bitýin taǵatsyzdana kútip júr. Degenmen bul metsenattyń týǵan aýylyna jasaǵan alǵashqy qaıyrymdylyǵy emes.
«Buǵan deıin avtobýstar satyp alyp, baǵdarǵa qostym, zamanaýı aıaldama pavılondaryn, dúkender salǵyzdym. Óıtkeni, aýyldyń arasy uzaq, balalar mektepke barý úshin 4 shaqyrym jol júredi. Qazir eki aıaldamanyń qurylysy aıaqtaldy», - deıdi metsenat.
Keshen qurylysy aıaqtalǵan soń metsenat ony jergilikti iskerlerge tegin bermek.
«Olar bul nysandarda óz jobalaryn iske asyrýyna bolady. Konkýrs jarııalaǵanbyz, bolashaǵy zor jobalardy qarap jatyrmyn. Іriktelgen jobalardyń avtorlaryna nysandardy tegin beremin», - deıdi S. Idııatov.
2017 jylǵy 12 sáýirde Qazaqstan Prezıdenti Nursultan Nazarbaev «Rýhanı jańǵyrý» atty kólemdi maqalasynda «Týǵan jer» baǵdarlamasyn iske asyrýdy usynǵan bolatyn.
Baǵdarlama aıasynda qazaqstandyqtar búkil respýblıkada óz qarajattaryna túrli jobalardy iske asyryp, týǵan ólkesin damytýǵa úles qosyp keledi.
