BQO máslıhatyna jańadan hatshy saılandy

ORAL. QazAqparat – Jetinshi shaqyrylymdaǵy oblystyq máslıhattyń birinshi sessııasy bolyp, jańadan hatshy saılandy, dep habarlaıdy QazAqparat tilshisi.

Oblystyq saılaý komısssııasynyń tóraǵasy Ǵaısa Qapaqov saılaý qorytyndysyn jarııa etip, depýtattarǵa mandattar men tósbelgilerin tabys etti.

Sessııaǵa qatysqan oblys ákimi Ǵalı Esqalıev osyǵan deıin halyq qalaýlysy bolǵandarǵa jemisti qyzmeti úshin rızashylyǵyn bildirip, jańa quramǵa tabys tiledi.

«Alda turǵan bes jyl merzim ishinde memlekettik saıasatty júzege asyrý maqsatynda kóp is tyndyrýymyz kerek. Turǵyndardyń jaıly ómir súrýi sizderdiń qandaı sheshim qabyldaıtyndaryńyzǵa baılanysty. Óńirge túbegeıli ózgerister kerek. Barlyq saıası partııa ókilderimen birlese qyzmet atqarýǵa daıynbyz. Bul rette máslıhattyń róli erekshe», dedi óńir basshysy.

Máslıhat hatshysy bolyp osyǵan deıin BQO ákiminiń keńesshisi qyzmetin atqarǵan Bıbigúl Qonysbaeva saılandy.

Sondaı-aq tórt turaqty komıssııalardyń quramy men tóraǵalary bekitildi.
Depýttattyq quram edáýir jańardy. Atap aıtqanda, 31 depýtattyń 21-i jańadan saılandy. «Nur Otan» 25, «Aýyl» men «Aq jol» partııalary úsh-úshten mandat aldy.

Eske sala keteıik, budan buryn BQO-nyń depýtattyǵyna kimder saılanǵanyn jazǵan bolatynbyz.

Buǵan deıin BQO máslıhatynyń hatshysy qyzmetin atqarǵan Málik Qulshar Májilis depýtaty bolyp saılandy.

Sýretterdi túsirgen: Rafhat Halelov