BQO quramasy jas ólketanýshylardyń respýblıkalyq forýmynda jeńimpaz atandy
ORAL. QazAqparat - Oralda «EKSPO-2017» halyqaralyq kórmesi jáne «Týǵan jer» baǵdarlamasy aıasynda jas ólketanýshylardyń, ekologtar men tabıǵat zertteýshileriniń «Qazaqstan - meniń elim» atty respýblıkalyq forýmy qorytyndylandy, dep habarlaıdy «QazAqparat» tilshisi.
Jas urpaqtyń týǵan ólkege degen súıispenshiligin arttyrý, ekologııalyq mádenıetin qalyptastyrý maqsatynda uıymdastyrylǵan keń aýqymdy sharaǵa elimizdiń 13 oblysynan 144 oqýshy qatysty.
«Eýrazııa» týrıstik-saýyqtyrý ortalyǵy men Nazarbaev zııatkerlik mektebinde ótken forým qorytyndysynda «Densaýlyq jáne qorshaǵan orta», «Jasyl ekonomıka», «Týǵan ólkeni zertteımiz», «Ekoálem» atalymdary boıynsha jeńimpazdar anyqtaldy. «Qus qanatyndaǵy arman» sharasynda qaraǵandylyq Amalııa Bıslınger jeńimpaz atansa, batysqazaqstandyq Roman Smaglyı ekinshi, shyǵysqazaqstandyq Aleksandr Spırıdonov úshinshi orynǵa ıe boldy. Ekologııalyq saıysta Pavlodar, Soltústik jáne Batys Qazaqstan oblystary úzdik shyqty. Al «Jasyl oazıs» ekodızaınerler baıqaýynda Atyraý, Almaty, Jambyl oblystarynyń komandalary aldyńǵy úsh oryndy bólisti.
Jalpykomandalyq esepte BQO quramasy jeńimpaz atandy. Almatylyqtar ekinshi, atyraýlyqtar úshinshi orynǵa kóterildi. 
