BQO qoımalarynda 151 myń tonna astyq saqtalýda
ORAL. QazAqparat – Batys Qazaqstan oblysynda 260 myń tonna dándi daqyldar jınaldy, dep habarlaıdy QazAqparat tilshisi.
BQO aýyl sharýashylyǵy basqarmasy basshysynyń orynbasary Denıs Omashevtiń Óńirlik kommýnıkatsııalar qyzmeti alańynda ótken brıfıngte málim etkenindeı, bıyl 228 myń gektardan 260 myń tonna ónim alyndy. Bul, ótken jylǵydan 18 myń tonnaǵa kóp.
Ár gektardan 11,4 tsentnerden aınaldy. Sonyń ishinde 80 myń gektar kúzdik bıdaıdan 170 myń tonna (ár gektarǵa 21,2 tsentnerden), 148 myń ga jazdyq bıdaı alqabynan 90 myń tonna (ár gektarǵa 6,1 tsentnerden) ónim jınaldy.
Maıly daqyldar 116,2 myń gektar alqapqa egilip, sonyń 113,6 myń gektarynan 58 myń tonna ónim (ár gektarǵa 5,1 tsentnerden) alyndy. Maıly daqyldardy jınaý jalǵasýda.
Sondaı-aq 4081 ga alqaptan 57 511 tonna kartop (ár gektarǵa 140,9 tsentner), 3331 gektardan 46 243 tonna kókónis (ár gektarǵa 138,8 tsentner), 1716 gektardan 24 218 tonna baqsha daqyldary (141,1 tsentner) alyndy.
Qazirgi kezde kúzgi dalalyq jumystar júrgizilýde.
«Oblys boıynsha lıtsenzııasy bar 8 astyq qabyldaý kásiporny biliktilik talaptaryna sáıkes keledi. Olardaǵy qoımalardyń syıymdylyǵy – 514,8 myń tonna. Kúni búgin qoımalarda 151,1 myń tonna astyq saqtalýda», dedi Batys Qazaqstan oblysy Aýyl sharýashylyq basqarmasy basshysynyń orynbasary Denıs Omashev.
