BQO kolledjderinde tekserý: 8 mln teńge zańsyz jumsalǵan
BQO prokýratýrasynyń baspasóz qyzmetinen túsken málimetke qaraǵanda, stýdentterdi jataqhanamen qamtamasyz etpeý, sabaqty durys júrgizbeý, qarajatty negizsiz jumsaý sekildi derekter belgili boldy.
Alty kolledjde (Oral aqparattyq-tehnologııalyq, Oral polıtehnıkalyq, Batys Qazaqstan ındýstrıaldyq, Aqsaı tehnıkalyq, Ekonomıka jáne aqparattyq tehnologııalar, Batys Qazaqstan ınjenerlik-tehnologııalyq kolledjderi) basqa qaladan kelip oqıtyn stýdentterge arnalǵan jataqhanalardyń joqtyǵy anyqtaldy, al bul memlekettik tapsyrysty alý úshin mindetti shart bolyp esepteledi.
Aqsaı tehnıkalyq kolledji kontıngentti negizsiz 116 adamǵa kóbeıtip, bıýdjetten 3 mln teńgeni zańsyz alǵan. Qarajatty alý úshin oqýdan shyǵarylǵan jáne bitirip ketkender jalpy tizimge ádeıi engizilgen.
Bókeı ordasy, Jalpaqtal, Qaratóbe, Terekti, Syrym jáne Shyńǵyrlaý aýdandarynyń kolledjderinde sabaqqa qatyspaı, ár jerde jumys jasaǵandarǵa shákirtaqy tólengen. Mysaly, S. esimdi stýdent 2016-2017 jyldary Terekti kolledjinde oqı tura, Shyńǵyrlaý aýdanynyń veterınarııalyq stansasynda turaqty jumys jasaǵan. Soǵan qaramastan, aı saıynǵy shákirtaqysyn alyp turǵan.
Sonymen qatar barlyq jerde jumyspen qamtamasyz etilgen túlekter sany jasandy túrde arttyrylǵan. Atap aıtqanda, Jalpaqtal kolledjinde 2017 jyly jumysqa ornalasý kórsetkishi 92 paıyzdy quraǵan. Shyn mánisinde bul 48 paıyz bolǵan, sebebi 41 túlek jumysqa ornalasqany jóninde ótirik málimet tapsyrǵan.
Oral qalasy gaz, munaı jáne salalyq tehnologııalar kolledjiniń keıbir stýdentterine oqý jýrnalyna belgi qoıylǵanymen, olar sol kúnderi shetelde bolǵan.
Tasqala aýdanynyń kolledjinde basqa jerden kelip oqıtyn stýdentterge jazǵy jáne qysqy merzimde jeńildikpen jol júrýine qarastyrylǵan 75 myń teńge berilmeı, quqyqtary buzylǵan.
Prokýrorlyq tekseris nátıjesinde bıýdjetke barlyǵy 8 mln astam qarajat qaıtarylyp, 72 laýazymdy qyzmetker jaýapkershilikke tartyldy.