Oral men Beıjiń: Aqjaıyq delegatsııasy tarıhı kelisimderge qol jetkizdi
ORAL.KAZINFORM — Batys Qazaqstan oblysy men Qytaı Halyq Respýblıkasy arasyndaǵy iskerlik baılanys jańa deńgeıge kóterildi. Aqjaıyq óńirinen barǵan delegatsııa úsh kúndik issapar barysynda jalpy quny 134 mıllıard teńgeni quraıtyn 14 iri ınvestıtsııalyq jobany qamtıtyn memorandýmdarǵa qol qoıdy.
Bul kelisimder — ekijaqty seriktestiktiń naqty nátıjesi ǵana emes, el Prezıdentiniń Joldaýynda júktelgen tapsyrmalardyń tikeleı oryndalýy.
Sapar barysynda delegatsııa músheleri Qytaıdyń Beıjiń jáne Nankın qalalarynda bolyp, álemdik deńgeıdegi alpaýyt kompanııalarmen kelissózder júrgizdi. Qol qoıylǵan memorandýmdar aıasynda óndiris, saýda, jasyl energetıka, medıtsına, bilim jáne logıstıka salalarynda birlesken jobalar júzege asady. Atap aıtqanda, alǵashqy eki zaýyttyń qondyrǵylary Qazaqstanǵa jóneltilip, qurylys jumystary aldaǵy kúnderi bastalady.
Investıtsııalyq serpilis: naqty jobalar bastalady
BQO ákimi Narıman Tóreǵalıevtiń aıtýynsha, 14 joba túgeldeı oblystyń ındýstrııalyq aımaǵynda júzege asady. Bul óńdeý ónerkásibin damytýǵa tyń serpin beredi.
— Memleket basshysynyń tapsyrmasyna sáıkes, ásirese óńdeý ónerkásibine ınvestıtsııa tartýǵa basa nazar aýdaryp kelemiz. Qytaılyq áriptestermen osy jobalardyń iske asýyn jedeldetý baǵytynda naqty máselelerdi talqyladyq, — dedi óńir basshysy.
Sondaı-aq, sapar barysynda Oral qalasynda jańa jylý elektr stantsııasyn salý máselesi boıynsha kelisim jasaldy. Jobany Qytaı tarapy tolyqtaı óz qarajatyna júzege asyrýǵa nıetti. Qazirgi ýaqytta zerdeleý jumystary júrgizilmek.
Bilim men kadr — basymdyqta
Investıtsııalyq jobalarmen qatar, jumys kúshi men kadr daıarlaý máselesi de basty nazarda. Qytaılyq ınvestorlar óndiris oryndary úshin zamanaýı tehnologııany meńgergen jergilikti mamandardyń qajet ekenin alǵa tartty. Osyǵan oraı taraptar birlesken qazaq-qytaı bilim berý baǵdarlamasyn iske asyrýǵa ýaǵdalasty.
— Búginde jańa tehnologııalarmen jabdyqtalǵan óndirister úshin bilikti kadr qajet. Osy maqsatta jergilikti jastardy oqytyp, qajetti qarajatty qytaılyq kompanııalar óz moınyna alýǵa daıyn, — dedi Narıman Tóreǵalıev.
Jańa logıstıkalyq hab jáne saýda ókildigi
Kelissózder kezinde oblys aýmaǵynda quny 17 mıllıard teńgege baǵalanatyn logıstıkalyq hab salý usynysy qaraldy. Joba tranzıttik júk tasymalyn qamtamasyz etýge jáne kólik-logıstıka ınfraqurylymyn damytýǵa baǵyttalǵan.
Sonymen qatar, Beıjiń qalasynda Batys Qazaqstan oblysynyń «Aqjaıyq» áleýmettik-kásipkerlik korporatsııasynyń ekinshi ınvestıtsııalyq jáne saýda ókildigi ashyldy. Bul ókildik aımaq pen Qytaı arasyndaǵy bıznes-baılanystardy nyǵaıtyp, tikeleı seriktestikke jol ashady.
Іri seriktester qatarynda — Beijing Jinyi Yuanfang holdıngi
Beıjińdegi kelissózder barysynda quramynda 22 holdıngtik jáne 7 enshiles kompanııasy bar, jyldyq tabysy 4,5 mıllıard ıýannan asatyn Beijing Jinyi Yuanfang holdıngimen de strategııalyq áriptestik ornatyldy. Holdıng oblysqa birqatar sala boıynsha — óndiristen bastap, medıtsına men bilimge deıin — ınvestıtsııa quıýǵa daıyn ekenin málimdedi.
Batys Qazaqstan oblysynyń Qytaımen ornatqan jańa kelisimderi óńirdiń áleýmettik-ekonomıkalyq damýyna aıtarlyqtaı úles qospaq. Bul — tek qujat júzindegi josparlar emes, naqty ınvestıtsııa tartýǵa, jumys oryndaryn ashýǵa, zamanaýı óndiris oryndaryn iske qosýǵa baǵyttalǵan úlken qadam. Endi jobalardyń tıimdi ári ýaqtyly oryndalýy — basty mindet.