BQO Qytaı ınvestorlaryna jańa múmkindikter usyndy
BEIJІŃ. KAZINFORM — Batys Qazaqstan oblysynyń ákimi Narıman Tóreǵalıev Qytaıǵa issapary aıasynda Lıaonın provıntsııasynyń ákimshilik ortalyǵy — Shenıan qalasynyń iri bıznes ókilderimen kezdesti.
BQO ákiminiń baspasóz qyzmeti málim etkendeı, is-shara Qazaqstan Respýblıkasynyń Qytaı Halyq Respýblıkasyndaǵy Elshiliginiń qoldaýymen uıymdastyryldy.
Mańyzdy kezdesý — Memleket basshysy Qasym-Jomart Toqaevtyń syrtqy ekonomıkalyq baılanystardy nyǵaıtý jáne ınvestıtsııalyq yntymaqtastyqty odan ári tereńdetý jónindegi tapsyrmalaryn oryndaýǵa baǵyttalǵan kezekti is-shara. Keıingi 3 jylda Batys Qazaqstan oblysy Qytaıdyń 5 provıntsııasymen tyǵyz baılanys ornatty.
Basqosýǵa 70-ten astam kásipker qatysty. Olarǵa Aq Jaıyq óńiriniń ınvestıtsııalyq áleýeti týraly beınerolık kórsetildi. Aımaq basshysy memleket tarapynan sheteldik ınvestorlardy qoldaý sharalaryna toqtalyp, bıznes qaýymdastyǵyn oblys aýmaǵynda naqty jobalardy iske asyrýǵa shaqyrdy.
— Bizdiń óńir de, Shenıan qalasy da — mańyzdy ónerkásiptik jáne kólik-logıstıkalyq ortalyqtar. Toǵyz joldyń torabynda ornalasqan oblysymyz — ınvestorlar úshin qolaıly aımaq. Biz áleýetimizdi odan ári arttyrý arqyly zamanaýı óndiris oryndaryn ashýǵa jáne halyqaralyq seriktestikti damytýǵa árqashan múddelimiz, — dedi Narıman Tóreǵalıev.
BQO kásipkerlik jáne ındýstrııalyq-ınnovatsııalyq damý basqarmasynyń basshysy Nurjan Ótepbaev óńirde ınvestıtsııalyq jobalardy súıemeldeý boıynsha naqty júıe qalyptasqanyn jáne ınfraqurylymmen qamtamasyz etilgen óndiristik alańdar jasaqtalǵanyn atap ótti. Sondaı-aq salyqtyq jeńildikter týraly túsindirdi.
Kezdesýde qytaılyq kásipkerler de ózderiniń joba-josparlaryn aıtyp, óńirge ınvestıtsııa salýǵa nıet bildildi.
— Kásipkerler oblys basshysymen tikeleı kezdesip, saýaldaryna jaýap aldy. Bul óte mańyzdy. Menimen birge 15 kompanııanyń jetekshileri keldi. Olar óndiris, aýyl sharýashylyǵy, qurylys sııaqty salalarda jumys isteıdi. Bári Qazaqstanǵa sonyń ishinde Batys Qazaqstan oblysyna ınvestıtsııa salýǵa nıetti. Bul kompanııalar aımaqta jalpy quny 10 mıllıard dollar bolatyn jobalardy júzege asyrýǵa daıyn, — dedi Qazaqstan-Qytaı ekonomıkalyq, saýda jáne ınvestıtsııalyq qyzmet ortalyǵynyń jetekshisi Fen Haoıan.
Aıta keteıik, qazir óńirde qytaılyq 10 iri kompanııa birqatar salaǵa qarjy quıdy. Byltyr BQO men Qytaı arasyndaǵy saýda aınalymy 1,5 ese artyp, 175 mıllıon dollarǵa jetti.
