BQO Qytaı ınvestorlaryna jańa múmkindikter usyndy
BEIJІŃ. KAZINFORM — Aımaq basshysy Narıman Tóreǵalıev jetekshilik etken batysqazaqstandyq resmı jáne iskerlik delegatsııa Qytaıǵa jumys saparymen bardy. Onyń aıasynda oblys ákimi Lıaonın provıntsııasynyń gýbernatory Van Sınveımen kezdesti. Іs-sharanyń ótýine Qazaqstan Respýblıkasynyń Qytaı Halyq Respýblıkasyndaǵy Elshiligi qoldaý kórsetti.
Halyq sany 40 mıllıonnan asatyn Lıaonın provıntsııasy — munaı-gaz salasynda tájirıbesi mol, ónerkásiptik áleýeti joǵary óńir. Bul salalar Batys Qazaqstan oblysy úshin de erekshe mańyzǵa ıe. Agrarlyq sektordy damytýdaǵy qolaıly múmkindikter jaǵynan da qos ólkeniń uqsastyǵy kóp. Aımaq basshysy Narıman Tóreǵalıev Qazaqstan-Qytaı qarym-qatynastarynyń «altyn 30 jyldyǵy» aıasynda óńiraralyq yntymaqtastyq jańa deńgeıge kóteriletinine senim bildirdi. Oblys ákimi eki el kóshbasshylarynyń basshylyǵymen Qytaı men Qazaqstan arasyndaǵy strategııalyq áriptestik sapalyq turǵydan nyǵaıyp kele jatqanyn atap ótti.
— Prezıdent Qasym-Jomart Kemeluly Toqaevtyń tapsyrmasymen biz óńirdegi ınvestıtsııalyq ahýaldy odan ári jaqsartyp, qyzyǵýshylyq tanytqan kompanııalarǵa jańa múmkindikter usynyp otyrmyz. Qytaılyq ınvestorlarmen birlesip, suıyq metanol, tsement zaýyttary, gaz týrbınaly jáne jel elektr stansalaryn salý jáne ózge de mańyzdy jobalardy iske asyryp jatyrmyz. Jumys oryndaryn asham, óndiristi damytam degen ınvestorlar úshin arnaıy ekonomıkalyq aımaq bar, — dedi Narıman Tóreǵalıev.
Lıaonın provıntsııasynyń gýbernatory Van Sınveı de óńiraralyq yntymaqtastyqty damytýǵa nıetti ekenin jetkizdi.
— QHR Tóraǵasy Sı Tszınpın eki el bir-birine senim artatyn strategııalyq seriktester ekenin únemi atap ótedi. Keıingi jyldary Lıaonın ólkesi men Qazaqstan arasyndaǵy baılanys bekı tústi. Byltyr ekijaqty saýda aınalymy 2,7 mıllıard ıýanǵa jetti. Sizderdiń Halyqaralyq baýyrlas qalalar forýmyna kelýlerińiz ortaq maqsat jolyndaǵy shynaıy yqylasty bildiredi, — dedi Van Sınveı.
Qytaılyq tarap dostyq baılanys, óndiristik yntymaqtastyqty tereńdetýden bólek, Qytaı men Qazaqstan mádenıetiniń jyly aıasynda mádenı-gýmanıtarlyq baılanystardy keńeıtýge de múddelilik tanytty.
