BQO kitaphanalarynda Qaırat aqynǵa qurmet kórsetildi
ORAL. QazAqparat - Búgin qazaqtyń kórnekti aqyny, aýdarmashy, Qazaqstan Jazýshylar odaǵynyń múshesi Qaırat Jumaǵalıevtiń 80 jyldyǵyna oraı óńir kitaphanalarynda bir mezette «Qazaqtyń Qaırat aqyny» atty shara ótkizildi, dep habarlaıdy «QazAqparat» tilshisi.
Osyǵan oraı J.Moldaǵalıev atyndaǵy oblystyq ǵylymı-ámbebap kitaphanasynda uıymdastyrylǵan keshke ardagerler men zııaly qaýym ókilderi, stýdent jastar qatysty.
Aqyn, Qazaqstan Jazýshylar odaǵynyń múshesi Aıtqalı Nárikov ótken ǵasyrdyń alpysynshy jyldarynyń basynda ádebıetke kelgen tegeýrindi toptyń qatarynda Qaırat aqynnyń shoqtyǵy bıik bolyp, poezııa áleminde aldyńǵy lekten kóringendigin jetkizdi. 
«Elbasynyń «Rýhanı jańǵyrý» baǵdarlamasyna sáıkes óńirde kóptegen sharalar uıymdastyrylýda. Ótken aptada ǵana aqyn Saǵynǵalı Seıitovtiń, oblystyq «Oral óńiri», «Prıýrale» gazetteriniń jáne Alashorda úkimetiniń 100 jyldyǵy keń kólemde toılanǵan edi. Endi, mine, oblys kitaphanalarynda aqyn Qaırat Jumaǵalıevtiń ómirlik belesi atalyp ótýde. Osynyń bári - ótkenimizdi qasterlep, ólkede jarqyn iz qaldyrǵan biregeı tulǵalarymyzdy qadirleý degen sóz. Kúni keshe aramyzda jarqyldap júrgen aqyn aǵamyzdyń esimi eshqashan umytylmaıdy», dedi BQO mádenıet, muraǵattar jáne qujattama basqarmasynyń basshysy Qadyrbolat Musaǵalıev.
Qazaqstan Jazýshylar odaǵynyń músheleri, aqyn Aısulý Qadyrbaeva, jazýshy Mıra Shúıinshálıeva, fılologııa ǵylymdarynyń kandıdaty, Batys Qazaqstan ınnovatsııalyq-tehnologııalyq ýnıversıtetiniń dotsenti Azamat Mamyrov Qaırat Jumaǵalıevtiń shyǵarmashylyq qyrlary men kishipeıil de aqjarma minezine, adamı qadyr-qasıetine toqtalyp, aqyn óleńderi qazaq halqymen birge jasaı beretinin atap ótti. 
Bókeı ordasynda 1937 jyly 16 qyrkúıekte ómir esigin ashqan Qaırat Jumaǵalıev 1952 jyly Orda aýdany taratylyp, jeriniń bir bóligi áskerı polıgonǵa berilgennen keıin anasy Jańylǵanymmen birge Ońtústik Qazaqstan oblysyna kóshirildi. Almaty qalasynda QazMÝ-da joǵary bilim alyp, «Jazýshy» baspasy men Qazaqteleradıo komıtetinde, sosyn Astanaǵa qonys aýdaryp, Parlament Senatynda jaýapty qyzmetter atqardy. Jasy jetpisten asqanda týǵan jeri - Aq Jaıyǵyna oralyp, «Jaıyq Press» JShS-da bas dırektordyń keńesshisi boldy. Onyń tuńǵysh jınaǵy 1964 jyly jaryq kórse, keıin otyzdan astam kitaby basylyp shyqty. Sonyń ishinde sońǵy kitaby - «Jaryq dúnıeni» kóziniń tirisinde oqyrmandary men urpaǵyna tabystap ketti.
Shara barysynda aqynnyń ómiri men shyǵarmashylyǵyna arnalǵan mýltımedııalyq ádistemelik qural tanystyryldy.
«Qaırattyń ózi bolmasa da, sońynda sózi qaldy. Óleńderi qaldy. «Óldi deýge bola ma aıtyńdarshy, Ólmeıtuǵyn artyna sóz qaldyrǵan», dep uly Abaı aıtqandaı, onyń 80 jyldyǵyna arnalǵan sharalar teatr, mektep, kitaphanalarda ótýde. Mine, bul - aqyn jyrlarynyń máńgi ólmeıtindiginiń aıǵaǵy. Sol úshin alǵysymdy bildiremin», dedi aqynnyń jary Sofııa Nyǵmetollaqyzy.
