BQO: kıikti zańsyz aýlaýshylardan óndirilgen 360 mln teńgeniń deni qaıtarylmaǵan
ORAL. QazAqparat - Batys Qazaqstan oblysynda kıikti zańsyz aýlaýǵa qatysty óndirilgen 360 mln astam teńgeniń deni memleketke qaıtarylmaı otyr, dep habarlaıdy QazAqparat tilshisi.
QR AShM Orman sharýashylyǵy jáne janýarlar dúnıesi komıteti BQO boıynsha aýmaqtyq ınspektsııasynyń basshysy Qaırat Qadeshevtiń aıtýynsha, ótken jyly sottarda 25 qylmystyq is qaralyp, 360,737 mln teńge zalal óndirilgen.
Alaıda kúni búgin sonyń 6,4 mln astam teńgesi ǵana memleketke qaıtarylǵan. Atalǵan qarajat boıynsha ınspektsııa quzyretti organdarǵa birneshe ret hat jibergenimen, ázirge odan aıtarlyqtaı nátıje bolmaı tur.
Jalpy, ótken jyly oblys boıynsha kıikti zańsyz aýlaý men onyń bólikterin tasymaldaýǵa qatysty 43 derek tirkelse, sonyń 25-i ǵana sotqa jetken. Sotta isi qaralǵan 32 adamǵa qatysty 1 jyldan 3 jylǵa deıingi merzimge bas bostandyǵynan shekteý túrindegi jaza qoldanylǵan. Sottar 12 ańshy myltyǵy, 6 avtokólik, 1 qarshana jáne 1 kvadratsıkl tárkilengen. Zań buzýshylardan sondaı-aq 91 kıik ushasy, 328 múıiz alynǵan.
«Qazirgi tańda óńirde 135 myńnan astam kıik bolsa, sonyń 70 paıyzy kórshiles Atyraý oblysyna aýysyp, qystaýda. «Ohotzooprom» ÓB» RMQK Oral óńirlik fılıalynyń ınspektorlary kıiktiń sońynan ere júrip, janýarlardy qorǵaý sharalaryn jalǵastyrýda», dedi QazAqparat tilshisine Q.Qadeshev.
