BQO «Qazsýshar» fılıaly tasqyn sýdy óńirdegi kólderge jiberip jatyr
ORAL. KAZINFORM – Batys Qazaqstan oblysynyń «Qazsýshar» fılıaly sý qoımalaryna jınalǵan tasqyn sýdy óńirdegi kólderge jiberip jatyr. Bul týraly Óńirlik kommýnıkatsııalar qyzmetiniń alańynda fılıal dırektory Raýan Hýsaınov málimdedi.
Búgingi tańda Pıatımar qoımasynan Kóshim ózeniniń tómengi aǵysynda ornalasqan kólderge sý jiberilýde. Jaıyq ózeni arqyly Oral-Kóshim sýarý-sýlandyrý júıesiniń sý qoımalaryna sekýndyna 17 tekshe metr sý kelip jatyr. Jyl basynan beri Jaıyqtan sýarý-sýlandyrý júıesine 57 mln tekshe metr sý keldi. Qajetti kólem jınaǵannan keıin lımandar men tabıǵı shabyndyqtarǵa sý jiberý bastalady.
10 naýryzdan beri Úlken Ózenge 18,9 mln tekshe metr tasqyn sý keldi, al Kishi Ózenge sý aǵyny kóp bolmady. Ózenderde ornalasqan sý qoımalary orta eseppen 67%-ǵa toldy. Salystyrý úshin: 2024 jylǵy sý tasqyny kezeńinde Úlken jáne Kishi Ózender arqyly 503 mln tekshe metr sý kelgen bolatyn.
Shaǵan sý qoımasy da tranzıt rejıminde jumys istep tur. Nysan 65%-ǵa toly. Sý tasqynynyń belsendi kezeńinen keıin nysan Oral qalasynyń saıajaılaryn, sharýa qojalyqtary men kásiporyndaryn sýmen qamtamasyz etý úshin sý jınaý rejımine aýysady.
Qazirgi ýaqytta fılıal oblystaǵy 3 sý qoımasy men 7 magıstraldyq kanaldy rekonstrýktsııalaý boıynsha jobalaý-smetalyq qujattama ázirlep jatyr. Bıyl Úlken Ózende jalpy kólemi 28 mln tekshe metr bolatyn sý qoımasyn salý, Jánibek sýarý-sýlandyrý júıesi men Jaıyqbaı sýlandyrý kanalyn rekonstrýktsııalaý bastalady. Kishi Ózende sý qoımasyn salý boıynsha jobalaý-smetalyq qujattama ázirleý josparlanǵan.
– Fılıalda táýlik boıy kezekshilik uıymdastyryldy, Reseı Federatsııasynyń sý qyzmetterimen jáne jergilikti, memlekettik, ýákiletti organdarymen turaqty aqparat almasyp otyrmyz. Kóktemgi sý tasqynyn fılıalǵa qarasty gıdrotehnıkalyq qurylystary arqyly qaýipsiz ótkizý úshin ınertti materıaldar qory daıyndaldy, jerqazý-qurylys tehnıkasy bar jyljymaly brıgada jasaqtaldy, - dedi Batys Qazaqstan oblysynyń «Qazsýshar» fılıalynyń dırektory Raýan Hýsaınov.
Eske salsaq, osyǵan deıin Sý resýrstary jáne ırrıgatsııa mınıstri Nurjan Nurjigitov jaýapty basshylarǵa tasqyn sýyn aıdyndarǵa jiberý boıynsha jumysty qamtamasyz etýdi tapsyrǵan bolatyn.