BQO: «Qazaqstannyń turǵyn úı qurylys jınaq banki» salymshylarǵa ótemaqy tóleıdi
ORAL. QazAqparat - «Qazaqstan turǵyn úı qurylys jınaq banki» AQ óz salymshylarynan ótemaqy jónindegi ótinishterdi 8 aqpannan qabyldaı bastady. Bul týraly búgin Ortalyq kommýnıkatsııalar qyzmetiniń óńirlik fılıalynda ótken baspasóz máslıhatynda atalmysh banktiń BQO-daǵy fılıalynyń dırektory Qýanyshbek Hamzın málim etti.
Onyń aıtýynsha, úsh kúnniń ishinde 1200 ótinish qabyldanyp úlgergen. Bul jumys bıylǵy 1 maýsymǵa deıin júrgiziledi.
Ótken jylǵy 18 tamyzda teńge baǵamynyń erkin aınalymǵa jiberilýine baılanysty Elbasy Úkimetke turǵyn úı qurylys jınaq banki salymshylaryna ótemaqy tóleý tetigin qarastyrýdy tapsyrǵan bolatyn. Osyǵan oraı ótemaqy tóleý 2016 jyly 19,2 paıyzǵa, 2017 jyly 16,3 paıyzǵa, barlyǵy 35,5 paıyzǵa júrgizletin bolady. Salymshylar elektrondy úkimet portaly (www.egov.kz) jáne banktiń ǵalamtordaǵy kózi (www.hcsbk.kz) arqyly elektrondy qol qoıý tásilimen turǵyn úı qurylys jınaq sharttaryna qosymsha kelisimder jasaıdy.
Sonymen qatar jergilikti ákimdikterdiń qoldaýymen halyqqa qyzmet kórsetý ortalyqtary da qolushyn sozyp otyr, onda bank ókilderi baǵyt-baǵdar, keńes bere alady.
«Úkimet pen bank salymshylarǵa ótemaqy retinde 60,9 mlrd teńge bólip otyr. Bul - úlken qoldaý. Elimizde 500 myńdaı salymshy bolsa, Batys Qazaqstanda 28 myńnan asady. Olardyń birde-biri qoldaýsyz qalmaıdy», dedi Q.Hamzın.
