BQO qazaq drama teatrynda jańa premeranyń qoıylymy boldy

ORAL. QazAqparat – H.Bókeeva atyndaǵy Batys Qazaqstan oblystyq qazaq drama teatrynda orys dramatýrgi Alekseı Jıtkovskııdiń «Aǵash otyrǵyzý» atty týyndysy boıynsha premeranyń qoıylymy boldy, dep habarlaıdy QazAqparat tilshisi.

Spektakldi teatrdyń kórkemdik jetekshisi, «Parasat» ordeniniń ıegeri Nurlygúl Jubatova qoısa, qazaqshaǵa aýdarǵan - batysqazaqstandyq qalamger, Qazaqstan Jazýshylar odaǵynyń múshesi Darıǵa Mushtanova.

Sýretshi Murat Mámbetov bezendirgen sahnada negizgi tartys aǵash otyrǵyzýǵa shyqqan áke (Asyljan Jakın) men bala (Sultanmýhammedshah Tóleýov) arasynda órbıdi.

Birin-biri sózben túırep, túsine almaýǵa deıin jetken talasqa keıin sol mańdy qorıtyn kúzetshiler (Salaýat Túmenov pen Raıymbek Ermek) aralasady.

Sóıtse, áke men bala aǵash otyrǵyzamyn dep júrip, bireýdiń jekemenshik jerine, golf alańyna kirip ketip, jerin qazyp tastaǵan shyǵady.

Endi qymbat jerdi qalaı qalpyna keltiremiz dep talasady. Ákeniń bazardan satyp alǵan alma aǵashy da plastık eken.

Aqyry bári jasandy aǵashty otyrǵyzyp, máseleni sheshkendeı bolady.

«Týyndyny shákirtim Nurlygúl Jubatova sahnalasa, jastar óz rolderin barynsha alyp shyqty. Bul spektakl «biz qandaı urpaq tárbıeleýdemiz, qoǵam qaıda bara jatyr, jaı ǵana plastıka emes, bizdiń oılaý júıemizdiń ózi plastıkaǵa aınalyp bara jatyr ma?» degen saýaldarǵa jaýap izdeıdi. Kúlip otyryp, oılanatyn dúnıe eken. Eń bastysy, qoıylymnyń ǵumyry uzaq bolsyn», - dedi premeraǵa qatysqan belgili rejısser ári akter, Qazaqstannyń eńbek sińirgen ártisi, «Qurmet» ordeniniń ıegeri Murat Ahmanov.

Eske sala keteıik, budan buryn BQO qazaq teatrynyń jańa maýsymy «Tomırıs» tragedııasymen ashylǵanyn jazǵan bolatynbyz.