BQO: qaraýyndaǵy qyzmetker para alǵan basshyny qyzmetinen bosatý usynyldy

  ORAL. QazAqparat - Batys Qazaqstan oblysy boıynsha Ádep jónindegi keńes búgin ishki memlekettik aýdıt departamenti basshysynyń orynbasary Meńdibek Aqmalıevtiń tártiptik isin qarady, dep habarlaıdy QazAqparat tilshisi.

Keńes otyrysynda aıtylǵanyndaı, BQO boıynsha ishki memlekettik aýdıt departamentiniń bólim basshysy K.Ermekqalıeva bıylǵy sáýirde Oral qalalyq sotynyń úkimimen QR QK 366-baby 2-bóligine sáıkes aıypty dep tanylyp, oǵan paranyń alpys eselengen mólsherinde, ıaǵnı 12 mln teńge aıyppul salynǵan bolatyn.

K.Ermekqalıeva BQO din isteri basqarmasy men «Din máselelerin zertteý ortalyǵy» KMM-nyń qarjylyq-sharýashylyq qyzmetine tekserý júrgizip, dinı ekstremızm men terrorızmge qarsy is-qımyl jónindegi memlekettik baǵdarlamany júzege asyrý barysynda zańbuzýshylyqtardy anyqtaǵan. Sodan keıin ol aýdıttik tekserýdiń oń qorytyndysyn shyǵarý úshin din isteri basqarmasynyń sol kezdegi basshysy S.Ǵızzatovtan 200 myń teńge kóleminde para talap etip, aqsha alý kezinde ustalǵan edi.

QR Memlekettik qyzmet isteri jáne sybaılas jemqorlyqqa qarsy is-qımyl agenttigi BQO boıynsha departamenti júrgizgen qyzmettik tekserý barysynda Ermekqalıevanyń tikeleı basshysy M.Aqmalıevtiń sybaılas jemqorlyq quqyqbuzýshylyǵyn jasaǵany anyqtaldy. Tergeý júrgizilip jatqan kezdiń ózinde-aq K.Ermekqalıeva parany M.Aqmalıevtiń talap etýi boıynsha alǵanyn kórsetkenimen, ony sotta dáleldeı almaǵan.

Búgin otyrysta Ádep jónindegi keńes múshelerine vıdeo kórsetildi. Onda Ermekqalıevanyń Aqmalıevtiń kabınetine kirip, «sóıleseıik», dep alyp shyqqany, sodan keıin din isteri basqarmasyn tekserý barysynda zańbuzýshylyqtar bar ekeni, ony sheshý kerektigi jóninde jumbaqtap sóıleskeni kórinedi. Áńgime barysynda «200 usynady» degen sekildi sózder aıtylady. Qorytyndy sheshimin tezirek aıtyńyz degen Ermekqalıevanyń sózine Aqmalıev jaýap bermeıdi.

Otyrysta M.Aqmalıev qaraýyndaǵy qyzmetkerge senip, onyń sózin toqtatpaǵanyn, tıisti organdarǵa habarlamaǵanyn aıtyp, soǵan ǵana ózin kináli sanaıtynyn jetkizdi.

Ádep jónindegi keńes músheleri tártiptik isti saralaı kele, M.Aqmalıevti memlekettik qyzmetshi mindetterin saqtamaǵany úshin ony qyzmetinen bosatý týraly QR Qarjy mınıstrligi Іshki memlekettik aýdıt komıteti tóraǵasyna usynys jasaýdy jón dep tapty.

Eske sala keteıik, budan buryn para alǵan K.Ermekqalıevaǵa 12 mln teńge kóleminde aıyppul salynǵanyn jazǵan bolatynbyz.