BQO: Qaratóbe, Terekti aýdandarynda tótenshe jaǵdaı jarııalandy
ORAL. KAZINFORM — Batys Qazaqstan oblysynyń Qaratóbe jáne Terekti aýdandarynda tótenshe jaǵdaı jarııalandy.
Qaratóbe aýdany ákimdiginen túsken málimetke qaraǵanda, aýdan ákiminiń jergilikti aýqymdaǵy tabıǵı sıpattaǵy tótenshe jaǵdaı jarııalaý týraly sheshimi shyqty.
Osyǵan baılanysty aýdan aýmaǵynda tıisti is-sharalar atqarylatyn bolady. BQO TJ departamentiniń málimeti boıynsha 27 naýryz kúni Qorjyn aýylynda 80 úı sý astynda qalyp, 281 adam mektepke kóshirilgen edi.
Aýyl turǵyndarynyń sózine qaraǵanda, qulaǵan úıler bar, usaq mal shyǵynǵa ushyraǵan.
Qazirgi ýaqytta oqıǵanyń jaı-japsary anyqtalý ústinde.
Sonymen qatar Terekti aýdanynyń ákimi Álııa Muhanbetjanova aýdan aýmaǵynda tótenshe jaǵdaı jarııalaý týraly sheshimniń portalǵa shyqqanyn jetkizdi.
Onyń aıtýynsha, ózi basy-qasynda bolǵan Ańqaty aýylynda 20 úı sýǵa ketken. Oral qalasyna irgeles ornalasqan Podstepnyı aýylynda sonymen shamalas. Terekti, Uzynkólde de sýǵa ketken úıler bar. Olardyń sany naqtylaný ústinde.
BQO TJ departamentiniń baspasóz qyzmetinen málim etkenindeı, oblysta osy kezge deıin 273 264 tekshe metr qar sýy sorylyp, 15 937 qapshyq tóselgen. Sý tasqynynyń aldyn alý sharalaryna 696 adam, 137 tehnıka, 138 motompompa tartylǵan.
Eske sala keteıik, budan buryn Batys Qazaqstan oblysy Qorjyn aýylynda úıler sý astynda qalǵanyn jazǵan bolatynbyz.
Sondaı-aq Oral qalasynda tótenshe jaǵdaı jarııalandy.
Batys Qazaqstan oblysynda 350-ge jýyq adam evakýatsııalandy.
