BQO ishki ister departamentinde alty balanyń anasy marapattaldy

ORAL. QazAqparat - Otbasy kúnine oraı BQO ishki ister departamentiniń ákimshilik polıtsııasy basqarmasynda merekelik shara ótip, onda qyzmettik mindetin atqarý kezinde kóz jumǵan qyzmetkerlerdiń jubaılaryna qurmet kórsetildi.

Departamenttiń baspasóz qyzmetinen túsken málimetke qaraǵanda, atap aıtqanda, Berikqalı Qajenov, Bolat Isaǵalıev, Aıǵalı Alıhanovtyń jarlary - kóp balaly ana Gúlshat Qajenova, Elvıra Isaǵalıeva, Aǵaısha Alıhanovaǵa «Ofıtserdiń jary» atty tósbelgi men baǵaly syılyqtar tabys etildi. Sondaı-aq alty balany ómirge ákelip, tárbıelep otyrǵan Aıjol Eroleevtiń zaıyby Sabıraǵa da dál osyndaı tartý jasaldy.

Otbasy kúnimen qatysýshylardy quttyqtaǵan BQO ІІD bastyǵynyń orynbasary, polıtsııa polkovnıgi Talǵat Aqaev: «Otbasynda bala tárbıeleý óz aldyna, onymen qosa tártip saqshysynyń ardaqty jary bola bilý - abyroı. Al eri qaza bolǵannan keıin januıaǵa túsken bar aýyrtpalyqty moıymaı kótere bilý úlken erlik der edik. Biz qaza tapqan áriptesterimizdi eshqashan umytpaımyz. Sondyqtan olardyń otbasyna qolushyn sozý - paryzymyz», - dedi.

Qatysýshylar atynan «Kúmis alqa» ıegeri Sabıra Eroleeva departament basshylyǵy men jarynyń áriptesterine rızashylyǵyn bildirip, onyń kishi uly men qyzy ádemi bı oryndap berdi. Osy sharaǵa demeýshilik kórsetken «Batys Kapıtal Lımıted» JShS menedjeri Elena Karmeevaǵa alǵyshat tapsyrylsa, qurmetti eńbek demalysyna shyqqan bes polıtsııa qyzmetkeri de umyt qalǵan joq.

Shara sońy merekelik kontsertke ulasty.