BQO: Іri jol apatynda zardap shekken 8 adamnyń jaǵdaıy belgili boldy
ORAL. QazAqparat - Keshe Oral-Atyraý joly boıynda, Bogatsk aýyly tusynda bolǵan jol apatyna baılanysty tergeý amaldary júrgizilýde, dep habarlaıdy QazAqparat tilshisi.
BQO ishki ister departamentiniń baspasóz hatshysy Ibragım Júsipqalıevtiń aıtýynsha, VAZ-21099 avtokóliginiń júrgizýshisi aldyndaǵy kólikti basyp ozbaq bolyp, joldyń qarsy betine shyqqan. Saldarynan Deý Neksııamen soqtyǵysqan.
Jol apatynan Deý Neksııa kóliginiń jolaýshysy oqıǵa ornynda kóz jumdy.
Búgin oblystyq densaýlyq saqtaý basqarmasy basshysynyń orynbasary Gúlnár Ábdirahmanova naqtylaǵandaı, jol apaty saldarynan bir adam qaza taýyp, 8 adam jaraqat alǵan.
«Sonyń úsheýi Aqjaıyq aýdandyq aýrýhanasyna jatqyzyldy. Beseýi keshe oblystyq klınıkalyq aýrýhanaǵa júgingen. Onyń bireýine ota jasalyp, qazir jansaqtaý bóliminde. Bir bala keıin oblystyq kópbeıindi balalar aýrýhanasyna ornalastyryldy, jaǵdaıy aýyr. Jaraqat alǵandardyń bári de baqylaýda», - dedi ol.
Aıta keteıik, keshe Batys Qazaqstan oblysynda qolaısyz aýa raıyna baılanysty barlyq baǵyttar boıynsha joldar jabylǵan bolatyn. Búgin tańerteńgi 08.00-de qozǵalysqa qaıta ruqsat etildi.
