BQO Iran elimen saýda-ekonomıkalyq baılanysty jolǵa qoımaq
BQO ákiminiń baspasóz qyzmetinen túsken málimetke qaraǵanda, delegatsııa quramynda munaıgaz jáne aýyl sharýashylyǵy salalaryndaǵy iri qazaqstandyq kompanııalar ókilderi boldy.
Sapar barysynda Qazaqstannyń Irandaǵy elshiligi Tegeran qalasynda birneshe paıdaly júzdesý uıymdastyrdy. Atap aıtqanda, Batys Qazaqstan oblysynyń ákimi Altaı Kólginov Iran Islam Respýblıkasy munaı ónerkásibi jabdyqtaryn óndirýshiler uıymdary dırektorlar keńesiniń tóraǵasy Haııamııa jáne dırektorlar keńesi tóraǵasynyń orynbasary Lıdervamen kezdesti. Osy shara aıasynda BQO kásiporyndary men ırandyq munaı kompanııalarynyń basshylary da kezdesip, onda Batys Qazaqstan oblysynyń múmkindikteri tanystyrylyp, munaıgaz salasyna qatysty birqatar máseleler talqylandy.
Sapar barysynda Irannyń Aýyl sharýashylyǵy, Indýstrııa, shahta jáne saýda mınıstrlikteri, iri ırandyq kompanııalar, munaıhımııa ónerkásibi qaýymdastyǵy basshylary jáne ókilderimen kezdesýler boldy. Oǵan qosa Albrýz provıntsııasynda bıznes-forým bolyp, onda BQO-nyń ár saladaǵy áleýetti múmkindikteri tanystyryldy.
Kezdesýler kezinde taraptar BQO men Iran arasyndaǵy saýda-ekonomıkalyq, ınvestıtsııalyq, kólik-logıstıkalyq yntymaqtastyq máselelerin talqylady.
Sapar sońynda ónerkásip, munaıhımııa jáne aýyl sharýashylyǵy salalarynda birqatar ekijaqty kelisimder men memorandýmdarǵa qol qoıyldy.
BQO ákimi Altaı Kólginovtiń atap ótkenindeı, bıyl sáýir aıynda Elbasy Iran memleketine resmı saparmen bardy. Sol kezdesýler kezinde saýda qarym-qatynasyn damytý úshin kásipkerlerge vıza berý rásimin jeńildetý máseleleri qaraldy. Sondaı-aq eki el basshylary aýyl sharýashylyǵy, ǵylym, tehnologııa jáne mádenıet salasyndaǵy yntymaqtastyqty nyǵaıtý qajettigine nazar aýdardy. Endi sol kelisimder nátıjesinde óńiraralyq baılanysqa den qoıylýda.
