BQO ınspektsııasy kıikter sanynyń artýyna shaǵymdanǵan turǵyndarǵa jaýap berdi
ORAL. QazAqparat - Batys Qazaqstan oblysy orman sharýashylyǵy jáne janýarlar dúnıesi aýmaqtyq ınspektsııasy kıikter sanynyń artýynan halyqtyń sharýashylyqtaryna kelip jatqan zııanǵa qatysty shaǵymdarǵa jaýap berdi, dep habarlaıdy QazAqparat tilshisi.
BQO orman sharýashylyǵy jáne janýarlar dúnıesi aýmaqtyq ınspektsııasynyń basshysy Qaırat Qadeshevtiń aıtýynsha, ótken jyly óńirde 135 myń kıik sanaqqa ilikse, bıyl shamamen 200 myńǵa jýyqtady. Onyń naqty sany aldaǵy shilde aıynda anyqtalady.
Ótken mamyr aıynda kıikter jappaı tóldep boldy.
Osy rette, Q.Qadeshev jekelegen buqaralyq aqparat quraldarynda jarııalanǵan Qyzyl kitapqa engen atalmysh janýarlardyń sharýashylyq jerlerge zardabyn tıgizip jatqany týraly habarlarǵa túsinik berdi.
«Biz kıikter shoǵyrlanǵan Qaztalov jáne Jánibek aýdandarynda bolyp keldik. Mysaly, Jánibek aýdanyndaǵy Talov pen Borsy aýyldarynyń aralyǵynda 60 myńdaı kıik bar. Árıne, turǵyndar tarapynan kıikter jerdi taptap tastady degen pikirler burynnan aıtylyp júr. Buǵan aıtarym, árkim óziniń jerine muqııat bolýy kerek. Qorshap alsyn, ıá bolmasa qoryqshy ustasyn. Basqalaı ázir eshteńe isteı almaımyz», - dedi QazAqparat tilshisine Qaırat Qadeshev.
Qazirgi tańda kıikter negizinen sýdyń qasynda, onda malmen birge de jaıylady. Baǵýsyz júrgen mal da az emes. Ekinshiden, kıikter alasa ósken shópti jeıdi, shabyndyqqa zııanyn tıgizedi dep aıtý qıyn ári olar adam júretin jerge jaqyndamaıdy.
Kıik memleket tarapynan qorǵalatyndyqtan, ony «Ohotzooprom» ÓB» RMQK-nyń ınspektorlary kózden tasa qylmaıdy. Qazirgi tańda qyryq shaqty ınspektor tórt topqa bólinip, 8 avtokólikpen baqylap júr.
Mamandardyń aıtýynsha, kıikter kúzge qaraı Bókeı ordasy, Jańaqala aýdandaryna qaraı aýady. Erkin júretin janýardy bir jerde tizgindep ustaý múmkin emes.
«Máseleniń taǵy bir jaǵy bar. Ol - Bókeıorda rezervatyn qurýdy tezdetý. Sonda rezervat qorshalyp, kıikter sonyń ishinde júrer edi», - Q.Qadeshev.
