BQO ınfektsııa statsıonarlarynda 440-qa jýyq naýqas emdelip jatyr

ORAL. QazAqparat - Batys Qazaqstan oblysynda 1123 tósektik 18 ınfektsııalyq statsıonarda 439 adam emdelip jatyr, dep habarlaıdy QazAqparat tilshisi.

BQO densaýlyq saqtaý basqarmasy basshysynyń mindetin atqarýshy Arman Qalıbekov málim etkendeı, sonyń ishinde 29 naýqas jansaqtaý bóliminde jatyr.

Bulardyń ekeýi 50-ge deıingiler bolsa, jeteýi - 50-60, 12-si - 60-80 jas aralyǵyndaǵylar, 8-i - seksennen asqandar.

Arman Talǵatulynyń sózine qaraǵanda, 25 naýqastyń sozylmaly derti bar. Sonyń ishinde 22-si júrek-qan tamyrlary aýrýlary, úsheýi qant dıabetine shaldyqqan.

«Bıyl jyl basynan beri koronavırýstan 155, sonyń ishinde qańtarda - 28, aqpanda - 15, naýryzda - 30, sáýirde 42, mamyrda qazirdiń ózinde 40 naýqas dúnıeden ozdy. Bul sońǵy úsh aıda qaıtqandardyń sany kóbeıip otyrǵanyn kórsetedi. Olardyń 82-si áıelder bolsa, 73-i - er adamdar. Marqumdardyń 93,2 paıyzynda (138) sozylmaly derti, atap aıtqanda, 70 paıyzynyń júrek-qan tamyrlary aýrýlary, 12 paıyzynda qant dıabeti, 18 paıyzynda basqa syrqaty bolǵan. Sondyqtan turǵyndardan karantındik sharalardy buljytpaı saqtap, indetke qarsy egilý qajettigin eske salamyz», dedi A.Qalıbekov.

Batys Qazaqstan oblysynda 65546 adam vaktsınanyń birinshi, 27773-i ekinshi komponentimen egildi.

Eske sala keteıik, budan buryn BQO-da koronavırýs juqtyrǵandardyń teń jartysyna jýyǵy Oralda anyqtalǵanyn jazǵan bolatynbyz.