BQO gazetteriniń 100 jyldyǵyna oraı ekspedıtsııa uıymdastyryldy
ORAL. QazAqparat - Elbasymyzdyń «Rýhanı jańǵyrý» baǵdarlamasyna sáıkes Batys Qazaqstan oblystyq «Oral óńiri» jáne «Prıýrale» gazetteriniń 100 jyldyǵyna oraı Oraldan Bókeı ordasy aýdany Han ordasy aýylyna deıin ekspedıtsııa uıymdastyryldy, dep habarlaıdy «QazAqparat» tilshisi.
«Jaıyq Press» JShS ujymy qos gazettiń tarıhyn tereńirek tanyp-bilý maqsatynda osy basylymdardyń alǵashqy sany jaryq kórgen Han ordasyndaǵy baspahana ǵımaratynda boldy.
Ǵımarat aldynda bolǵan saltanatty jıynda aýdan ákimi Nurlan Rahymjanov oblystyq gazetterdiń ókilderin ǵasyrlyq toıymen quttyqtap, qalyń buqaraǵa memleket saıasatyn, elimiz ben óńirdiń ózgeris-jańalyqtaryn jetkizý, keıingi urpaqqa rýhanı tárbıe berý jolynda shyǵarmashylyq tabystarǵa jete berýlerine tilektestigin bildirdi.
Bókeı ordasy tarıhı-mýzeılik kesheniniń dırektory Ǵaısa Mahımov qos basylymnyń shyǵý tarıhyna toqtala kelip, ony áli de zertteı túsý qajettigin jetkizdi. «Oblystyq gazetterdiń bastaýy bolyp tabylatyn «Urannyń» 1917 jyly Ordada shyqqany jóninde ár jerde tam-tum aıtylady. Sonyń ishinde baspahanada jumys jasaǵan polıgrafıst Ibragım Mýlıakaevtyń qujattary da bar. Dálirek aıtqanda, onyń eńbek kitapshasynda «1916 jyl, ІІ aı, Ordadaǵy baspahananyń bas árip terýshisi І razrıad» degen jazý bar. Demek, baspahana tarıhy 1917 jyl emes, odan da áride jatyr», dedi Ǵ.Mahımov.
«1911 jyly Sháńgereı Bókeev, Ǵumar Qarash, Eleýsin Buırın, Baqytjan Qarataev, Ǵabdolǵazız Musaǵalıev syndy ult zııalylary Ordada «Qazaqstan» gazetin shyǵarǵany belgili. Baspahana sol kezden bastap-aq jumys jasaǵan bolýy ábden múmkin. Al osydan 100 jyl buryn, 1917 jylǵy 28 shildede Ordada Ǵabdolǵazız Musaǵalıev, Nuǵman Manaev «Uran» gazetin jaryqqa shyǵardy. Alashtyń týyn kóterip, qazaqtyń óz aldyna el bolýyn kóksegen basylymnyń qaz basyp ketýine Ǵumar Qarash, Mustafa Kókebaev, Támımdar Safıev, Halel Esenbaev syndy birtýar tulǵalar atsalysty. Qazaqstannyń ár jerinde osyndaı basylymdardyń ómirge kelip, taralýy halyqtyń basyn qosyp, birligin nyǵaıtýǵa úlesin qosty. Sol alashshyl tulǵalardyń isin keıingilerge úlgi etý maqsatynda qos gazettiń 100 jyldyǵyna arnalǵan mereıtoılyq sharalardy tarıhı Han ordasy aýylynan bastaýymyz da sondyqtan», dedi J.Safýllın.
Ekspedıtsııaǵa qatysýshylar Bókeı ordasy tarıhı-mýzeılik kesheni quramyndaǵy bes birdeı mýzeıde, sondaı-aq Jáńgir han, qazaqtyń tuńǵysh ǵalymdarynyń biri Muhamed-Salyq Babajanov, dáýlesker kúıshi Dáýletkereı jerlengen panteonda bolyp, babalar rýhyna taǵzym etti. Oǵan qosa tabıǵaty erekshe Han ordasynyń qaraǵaıly ormanyn da aralady.
