BQO gazetteriniń 100 jyldyǵyna arnalǵan baıqaý qorytyndylary jarııalandy
ORAL. QazAqparat - Búgin oblystyq qazaq drama teatrynda BQO «Oral óńiri» jáne «Prıýrale» gazetteriniń 100 jyldyǵyna arnalǵan saltanatty jıyn boldy, dep habarlaıdy «QazAqparat» tilshisi.
Osyǵan oraı qos gazet redaktsııasy men «Jaıyq Press» JShS ujymyn Oral qalasynyń ákimi Murat Muqaev quttyqtap, Elbasynyń «Rýhanı jańǵyrý» baǵdarlamasy aıasynda shaharda josparly sharalar ótip jatqandyǵyn, atalmysh mereıtoı sonyń biri ekendigin jetkizdi.
QR Aqparat jáne kommýnıkatsııalar mınıstrligi Aqparat komıteti tóraǵasynyń orynbasary Rýslan Alıshev, «Respýblıkalyq «Egemen Qazaqstan» gazeti» AQ basqarma tóraǵasynyń orynbasary Erbolat Qamenov, kezinde oblystyq «Oral óńiri» gazeti redaktsııasyna basshylyq etken, qazir Almaty qalasynda turatyn jýrnalıstıka ardageri Ǵarıfolla Kóshenov, «Mańǵystaý medıa» JShS dırektory Saǵyndyq Rzahmetov, Atyraý oblystyq «Atyraý» gazetiniń bas redaktory Isataı Balmaǵambetov jáne basqalar izgi tilekterin arnady.
«Jaıyq Press» JShS bas dırektory Jantas Safýllın qos gazettiń 100 jyldyǵyna oraı atqarylǵan jumystardan habardar etti.
Ǵasyrlyq mereıtoıǵa baılanysty bir top qyzmetkerge QR Aqparat jáne kommýnıkatsııalar mınıstrliginiń marapattary men oblys ákiminiń alǵyshattary tabys etildi. Sonyń ishinde «Jaıyq Press» JShS janyndaǵy BQO baspasóz tarıhyn zertteý ortalyǵynyń bas mamany Qazbek Quttymuratuly men oblystyq «Oral óńiri» gazetiniń bólim meńgerýshisi Sáken Ábilhalyqov «Aqparat salasynyń úzdigi» tósbelgisi, «Oral óńiri» men «Prıýrale» gazetteriniń tilshileri Gúlbarshyn Ájigereeva men Qalıolla Qaraǵoıshın mınıstrliktiń Qurmet gramotasymen marapattaldy.
Shara barysynda qazaqtyń kórnekti aqyny Qaırat Jumaǵalıevtiń 80 jáne oblystyq gazetterdiń 100 jyldyǵyna arnalǵan «Naryn qumyn ańsaǵan Qaırat aqyn» atty respýblıkalyq jyr músháırasynyń qorytyndylary jarııa etildi. Qazylar alqasynyń sheshimimen qazirgi kezde Ál-Farabı atyndaǵy QazMUÝ-diń fılologııa fakýltetiniń 3-kýrsynda oqyp jatqan batysqazaqstandyq Márlen Ǵılymhan, Semeı qalasynda turatyn Qýanysh Erkinuly jáne Jańaqala aýdanynan Syılyhan Jumasalyq júldeger atandy. 
Sondaı-aq qos gazettiń mereıtoıyna oraı magıstranttar men stýdentter arasynda kýrstyq jumystar baıqaýy jarııalanǵan bolatyn. Buǵan Ýfa qalasynda bilim alyp jatqan batysqazaqstandyq Álı Nábı HH ǵasyr basyndaǵy qazaq gazetteri men qazirgi qazaq gazetterindegi maqala taqyryptarynyń zerttelýi, sondaı-aq M.Ótemisov atyndaǵy Batys Qazaqstan memlekettik ýnıversıtetiniń magıstranty Ulbolsyn Moldaǵalıeva óz jumystaryn joldaǵan edi. Olardyń ekeýi de arnaıy dıplomdarmen marapattaldy.
