BQO-ǵa koronavırýsqa qarsy egiletin 5500 doza vaktsına jetkizildi
ORAL. QazAqparat – Batys Qazaqstan oblysyna koronavırýsqa qarsy egiletin 5500 doza Gam-KOVID-Vak (Sputnik V) vaktsınasy jetkizildi, dep habarlaıdy QazAqparat tilshisi.
BQO densaýlyq saqtaý basqarmasynyń basshysy mindetin atqarýshy Arman Qalıbekovtiń óńirlik kommýnıkatsııalar qyzmeti alańynda málim etkenindeı, sonyń ishinde 3250-i – birinshi, 2250 dozasy – ekinshi komponent.
Arman Talǵatulynyń sózine qaraǵanda, vaktsınatsııa keste boıynsha júrgiziledi. Birinshi kezekte bastapqy kezeńge ilikpeı qalǵan, koronavırýsty juqtyrý qaýpi joǵary medıtsına qyzmetkerleri egiledi. Odan ári muǵalimder men kúshtik qurylymdar qyzmetkerlerine ekpe salý josparlanýda.
Oblys boıynsha koronavırýsqa qarsy egý jumystary 1 aqpannan bastalǵan bolatyn. Al 22 aqpannan vaktsınanyń ekinshi komponentimen egý bastaldy.
«Birinshi dozadan keıin antıdenelerdiń azdaǵan mólsheri nátıjesinde uzaqqa sozylmaıtyn qorǵanysh áseri qalyptasady. Ekinshi doza birinshisiniń áserin kúsheıtip, adam aǵzasyndaǵy antıdeneler sany kóbeıedi. Qazirgi tańda bastapqyda egilgenderdiń barlyǵy derlik (950-den astam adam) vaktsına aldy. Jaqyn kúnderi olardy ekinshi komponentpen egýdi aıaqtaý kózdelýde», dedi A.Qalıbekov.
Kúni búgin 195 tósektik 4 karantındik statsıonarda 77 naýqas emdelýde. Al 591 tósektik 7 ınfektsııalyq statsıonarda 284 adam jatyr. 17 naýqas jansaqtaý bólimshesinde.
Invazıvti jasandy tynys alý apparatyna 2, ınvazıvti emes apparatqa 8, ottegi kontsentratoryna 7, ortalyqtandyrylǵan ottegi kózine 92 adam qosylǵan.
Eske sala keteıik, budan buryn BQO-da koronavırýs juqtyrǵan 276 adamnyń statsıonarda jatqanyn jazǵan bolatynbyz.
