BQO-ǵa bıyl 100-den astam jas dáriger maman kelmek
ORAL. QazAqparat - Bıyl Batys Qazaqstan oblysyna aldyn ala málimet boıynsha medıtsınalyq JOO-lardy bitirgen 127 túlek kelmek, dep habarlaıdy QazAqparat tilshisi.
Oblystyq densaýlyq saqtaý basqarmasy basshysynyń orynbasary Nurdanat Berkinǵalıulynyń aıtýynsha, uıymdastyrý sharalary nátıjesinde óńirde kadr tapshylyǵy edáýir tómendedi.
Degenmen qazirgi tańda 207 dáriger jetispese, sonyń 154-i Oralǵa, 53-i aýdandarǵa kerek. Ásirese, 51 jalpy tájirıbe dárigeri (jalpy jetispestikten alǵanda, 25 paıyz), 25 akýsher men gınekolog (12 paıyz), 19 anestezıolog pen reanımatolog (10 paıyz) jáne 10 kardıolog (5 paıyz) qajet.
«Kadr máselesin sheshý maqsatynda uzaq merzimdi josparlaý boıynsha 2017 jyly jergilikti túlekterdi medıtsınalyq JOO-larda oqytý úshin 24 grant bólindi. Bıyl qosymsha 20 grant berilmek. Jeti jyldan keıin bul mamandar oblysqa kelip, keminde bes jyl jumys jasaıdy. Oǵan qosa orta merzimdi josparlaýǵa sáıkes rezıdentýra men magıstratýra boıynsha 48 mamandy daıarlaýǵa jergilikti bıýdjetten qarjy bólý kózdelýde», dedi Nurdanat Berkinǵalı.
