BQO Ekonomıka jáne bıýdjettik josparlaý basqarmasyna jańa basshy taǵaıyndaldy

ORAL. QazAqparat - Búgin BQO ákiminiń birinshi orynbasary Arman Óteǵulov óńir basshysy Altaı Kólginovtiń ókimimen oblystyq ekonomıka jáne bıýdjettik josparlaý basqarmasynyń basshysy bolyp taǵaıyndalǵan Qaısar Zákiruly Mańqaraevty atalǵan mekeme ujymyna tanystyrdy.

Arman Kárimuly Qaısar Mańqaraevtyń osyǵan deıin túrli jaýapty qyzmetter atqaryp, tájirıbe jınaqtaǵanyn atap ótip, tabys pen jemisti jumys tiledi. Q.Mańqaraev ózine kórsetilgen senim úshin alǵysyn bildirdi.

Q.Mańqaraev 1979 jyly dúnıege kelgen. Joǵary qarjy-ekonomıkalyq bilimi bar, ekonomıst-býhgalter.

Ol eńbek jolyn 2004 jyly QR Qarjy mınıstrligi Dármensiz boryshkerlermen jumys komıteti tólemge qabiletsiz kásiporyndar bóliminiń jetekshi mamany bolyp bastady. 2005-2010 jyldary Astana qalasynda QR Ekonomıkalyq qylmysqa jáne sybaılas jemqorlyqqa qarsy kúres agenttiginiń (qarjy polıtsııasy) qyzmetkeri boldy. 2010-2012 jyldary «QR Parlamenti sharýashylyq basqarmasy ákimshilik ǵımarattar dırektsııasy» RMKK dırektorynyń orynbasary boldy.

2012 jyldyń shildesinen - «Oral» ÁKK» UK» AQ basqarma tóraǵasynyń birinshi orynbasary, tóraǵa mindetin atqarýshy.

2013 jyldan beri Oral qalasy ákiminiń ekonomıka, bıýdjet jáne qarjy máseleleri jónindegi orynbasary qyzmetin atqaryp keldi.

Aıta keteıik, budan buryn BQO ekonomıka jáne bıýdjettik josparlaý basqarmasynyń basshysy qyzmetin atqarǵan Bıbigúl Qonysbaeva bıylǵy 5 sáýirde oblys ákiminiń ekonomıka, qarjy máseleleri jónindegi orynbasary bolyp taǵaıyndalǵan edi.