BQO ekologııa departamenti Shaǵan ózenindegi jaǵymsyz ıiske qatysty túsinik berdi

ORAL. QazAqparat – BQO ekologııa departamenti Shaǵan ózenindegi jaǵymsyz ıiske qatysty túsinik berdi, dep habarlaıdy QazAqparat tilshisi.

Áleýmettik jelide jarııalanǵan beınejazbada Oral qalasynyń turǵyny Shaǵan ózenindegi shlıýz mańy sasyp ketkendigin habarlady.

«Shamasy, káriz jarylyp, sodan ózenge boqtyqtyń bári quıylyp jatqan bolýy kerek. Bul arada demalý múmkin emes. Ekologtar qaıda qarap otyr?» - deıdi jazba ıesi.

BQO ekologııa departamentiniń basshysy Erbol Qýanovtyń beınejazbada aıtylǵan jerge kelip turǵandyǵyn kórýge bolady, ol onda eshqandaı ıistiń baıqalmaıtynyn jetkizgen.

«Departamenttiń arnaıy mamandary sýdan synama aldy. Sonymen qatar Shaǵannyń Jaıyq ózenine quıar tusynan da synama alynady. Hımııalyq taldaý jasap, nátıjesin habarlaıtyn bolamyz», - dedi E.Qýanov.