BQO: Derkól-Tasqala gıdrobeketinde sý qaýipti deńgeıge jaqyndady
ORAL. QazAqparat - «Qazgıdromet» RMK BQO fılıalynyń málimeti boıynsha Derkól-Tasqala gıdrobeketinde sý qaýipti deńgeıge jaqyndady, dep habarlaıdy QazAqparat tilshisi.
9 sáýir kúni saǵat 21.00-de osy tustaǵy sý deńgeıi 458 santımetrge jetken. Qaýipti deńgeı - 500 sm.
Osyǵan baılanysty BQO TJ departamenti eskertý jarııalady. Qazirgi kezde tıisti sharalar qolǵa alynýda.
Tasqala aýdanynyń ákimi Sanjar Álıevtiń aıtýynsha, túngi salqyndyq jerdi qatyryp jatqandyqtan, ázirge qaýip joq. Degenmen 10 sáýirde kún qatty jylynýy yqtımal. Sondyqtan osyǵan daıyn bolý úshin barynsha qam jasaldy.
Aýdanda qardyń tez erýine baılanysty arnalar sýǵa tola bastady. Keshe Tasqala aýylynda aýdandyq aýrýhana tusymen ótip, Derkól ózenine quıylatyn arna (kanal) sýynyń deńgeıi kóterilip, sonyń boıyndaǵy úılerge sý kirý qaýpi tóndi. Sondyqtan Maıakovskıı jáne Gorkıı kóshelerin jalǵastyryp turǵan avtokólik ótetin bóget jyrylyp, sýdyń aǵý baǵyty ashyldy. Qaýip seıilgennen keıin bóget qaıta qalpyna keltiriletin bolady.
